Հովիկ Աբրահամյանը գովեց իր նախորդի նախորդին` Բագրատյանին

ԱԺ նիստում, մինչ կառավարության ծրագրի քվեարկությունը, ելույթ ունեցավ ՀՀ վարչապետը: Նա կարևորեց առողջ ու փաստարկված քննադատության ու կառուցողական ընդդիմության դերը:

Վարչապետը նշեց, որ որոշ ընդդիմախոսների ելույթներում տեսավ անկեղծ մտահոգություն` վիճակը դեպի լավը փոխելու համար: Նա նաև նշեց, որ գրանցելու են բոլոր կառուցողական առաջարկները` հետագայում դրանց անդրադառնալու պատրաստակամությամբ: Սակայն, վարչապետի խոսքով, ցավոք, եղան ելույթներ, որոնք անցան քաղաքական գործիչների անվանարկման սահմանը:

«Չեմ կարծում` ժողովուրդը դրան է սպասում, դա անհարգալից վերաբերմունք է սեփական ընտրողների հանդեպ: Թե' իշխանությունը, թե' ընդդիմությունը գտնվում են նույն նավում»,- ասաց վարչապետը: Որպես առողջ ընդդիմության լավագույն օրինակ` նա բերեց ՀՀ նախկին վարչապետ Հրանտ Բագրատյանի կեցվածքը, որը ոչ թե քաղաքական, այլ պետական գործչի կեցվածք էր: