Եթե ուզենք` կարող ենք շատ մեծ բարձունքների հասնել. Մկրտիչ Արզումանյան

Մենք պետք է միշտ ցնծությամբ և ուրախությամբ տոնենք մեր հաղթանակները, որովհետև դրանք շատ որոշիչ և կարևոր են եղել մեզ, մեր պետության կայացման համար. yerkir.am-ի հետ զրույցում կարծիք հայտնեց դերասան Մկրտիչ Արզումանյանը:

Շնորհավորելով Հաղթանակի 70-րդ տարեդարձի, ԼՂՀ պաշտպանության բանակի և Շուշիի ազատագրման օրվա առթիվ` նա նշեց, որ հաղթանակները մեզ ուժ են տալիս, և մենք` որպես ազգ, ինքներս մեզ ապացուցում ենք, որ կարող ենք անել առավելը, եթե ուզենք` կարող ենք շատ մեծ բարձունքների հասնել: «Հաղթանակները բոլորի համար էլ կարևոր են. եթե կգտնվի մեկը, որի համար այդ հաղթանակները մեծ նշանակություն չեն ունենա, կներեք, բայց դա նորմալ երևույթ չի դիտվի»,- ասաց դերասանը:

Արզումանյանը նշում է, որ ապրիլի 24-ին, դրան նախորդած հայաստանյան միջոցառումների ժամանակ մեծ համախմբվածություն է տեսել: «Անկեղծ ասած`մինչև վերջերս ուրիշ տրամադրվածություն ունեի, բայց այդ օրերին տեսա, թե ինչքան համախմբված ենք, հատկապես` երիտասարդները: Այդ ամենը տեսնելով` ես ինձ հպարտ զգացի, քանի որ տեսա` մեզ մոտ կա այդ համախմբվածությունը, եռանդն ու հետաքրքրությունը»,- նշեց նա: