Բուհերը շենքեր չեն, որ ուր ուզենք` տեղափոխենք. Աշոտյանը` որոշ բուհեր Գյումրի տեղափոխելու մասին

Բուհերը շենքեր չեն, որ ուր ուզենք` տեղափոխենք այսօր լրագրողներին ասաց ՀՀ ԿԳ Նախարար Արմեն Աշոտյանը` խոսելով երևանյան որոշ բուհեր Գյումրի տեղափոխելու խոսակցությունների մասին:  Նա հավաստիացրեց, որ բուհերը Երևանից Գյումրի տեղափոխելու նախագիծ չկա:

«Բուհական համակարգի կառուցվածքի արդիականացման հարցը մշտապես քննարկվում է, բայց բուհը կենդանի օրգանիզմ է, և ոչ ոք չի կարող այն մի տեղից մյուսը տեղափոխել: Գյումրիին լրացուցիչ կրթական առաքելություն տալու մասին քննարկումներ նույնպես լինում են, բայց այս պահին որևէ բուհ Գյումրի տեղափոխելու մասին խոսք անգամ լինել չի կարող»,- ասաց նախարարը:

Նա նշեց նաև, որ բուհերի խոշորացման հարցը նույնպես քննարկվում է, և կան առաջարկություններ, օրինակ` որոշ բուհեր Աբովյան տեղափոխել, Շիրակի պետական համալսարան ստեղծել, սակայն այս ամենը, նախարարի կարծիքով, չի կարելի քննարկել` համատեքստից որևէ գործոն կտրելով:

Հարցին, թե նախարարությունները որտե՞ղ պետք է տեղափոխել, Աշոտյանը կեսկատակ պատասխանեց. «Կարծում եմ` կարելի է մտածել ԿԳՆ-ն Մայր Աթոռ Սուրբ Էջմիածին տեղափոխելու մասին, քանի որ այդկերպ նախարարությունը կտանենք դեպի իր ակունքները»: