Վլադիմիր Գասպարյանն ակնարկեց գողականների կապերի մասին

Այսօր Հաղթանակի զբոսայգում ՀՀ ոստիկանապետ Վլադիմիր Գասպարյանը, պատասխանելով լրագրողների այն հարցին, թե Հայաստանում հանցագործությունների թիվը հունվար ամսից աճել է, և դա արդյո՞ք հետեւանք է այն բանի, որ ոստիկանապետը դիրքերը զիջել է, ասաց. «Ես զիջող մարդու նմա՞ն եմ»:

Իսկ դիտարկմանը, թե ակնհայտ սրվել է հանցավորության վիճակը Հայաստանում,  պատասխանեց. «Դուք, մեղմ ասած, ճիշտ չեք: Մտեք մեր կայք, հետևեք սխոդկաներին և կտեսնեք, որ չեք տիրապետում իրավիճակին: Աղմկահարույց սպանությունները բացահայտվում են իրար վրա: Դուք չեք տիրապետում իրավիճակին: Դուք սենսացիոն բաների հետևից եք ընկնում, դա սխալ մոտեցում է»:

Խոսելով քրեական հեղինակությունների միջև պայքարի ուժեղացման մասին` Գասպարյանն ասաց. «Բոլոր ժամանակներում քրեական հեղինակությունների` գողականների պայքարը եղել է և կա: Ուղղակի բանն այն է, որ այստեղ կապեր կան, և դրանով դառնում է աղմկահարույց»:

Ճշտող հարցին, թե ի՞նչ կապերի և ի՞նչ մարդկանց մասին է խոսքը, նա այդպես էլ չպատասխանեց:

Հարցին, թե ոստիկանական համակարգում փոփոխություններ չե՞ն սպասվում, Վլադիմիր Գասպարյանը պատասխանեց, որ ոստիկանական համակարգն իր տեղում է, բարեփոխումներ միշտ են լինում, ոստիկանական համակարգն այնպիսին է, ինչպիսին կա, և սա ճիշտ մոդել է, այս մոդելի շրջանակներում դուրս են քաղաքականությունից, դա գալիս է օրենքից: «Մենք վերկուսակցական կառույց պետք է լինենք: Այդ ամենը ստացվում է շատ ավելի, քան երեկ էր ստացվում, վաղը կստացվի շատ ավելի, քան այսօր»,- ասաց նա: