Մհեր Սեդրակյանը` գողականների, ''գեղի տղերքի'' ու իր խոսելաձեւի մասին

Yerkir.am-ի զրուցակիցն է ԱԺ ՀՀԿ խմբակցության պատգամավոր Մհեր Սեդրակյանը:

- Ոստիկանապետ Վլադիմիր Գասպարյանի հայտնի հայտարարությունը՝ «արա', դուք գողական ե՞ք, թե՞ պատգամավոր», մտածելու տեղիք տվեց` ի վերջո, ովքե՞ր են ԱԺ-ի գողական պատգամավորները: Ձեզ շատ հաճախ անվանում են գողական կամ հեղինակություն, հիմա Դուք գողական ե՞ք, հեղինակությո՞ւն, թե՞ պարզապես պատգամավոր:

-Ուրեմն` ես գողական չեմ կարող լինել, որովհետեւ գողականը ուրիշ աշխարհ ա: Ախր մարդիկ առանց հասկանալու՝ որը որից հետո ա, ասում են՝ սա գողական, նա գողական: Կա հարգված, հեղինակություն ունեցող մարդ, դա ուրիշ հասկացողություն ա, գողականը՝ ուրիշ: Ես եղել եմ պատգամավոր 95թ.-ին, դրանից հետո՝ համայնքի ղեկավար: Գողական կյանքում պետք ա գողը, գողականը ինքը չաշխատի, ինքը չի աշխատում, ինքը ինստիտուտ չի ավարտում, իրա կյանքը փոքրուց ուսումնասիրվում ա, բանակ չպետք ա գնա` ծառայի: Էդ փուլերով անցած մարդիկ ո'չ գողական կարող են լինել, ո'չ էլ գող: Գողականից հետո առաջանում ա գող հասկացողությունը՝ էդ արդեն օրենքով գող: Իսկ մարդիկ մտածում են՝ որ սա հարգանք ունի, բոլորն իրան ընդունում են՝ ինքը գողական ա: Էդպես չի, էդ հարգանքը ձեռք ա բերվել երկար տարիների ընթացքում` որպես հեղինակություն ունեցող մարդ:

-Հիմա Դուք հեղինակությո՞ւն եք համարվում, ձեւակերպումն այդպիսի՞ն է:

-Բնական ա` ես հեղինակություն եմ: Ես` ուր, գողական աշխարհն` ուր: Ընդամենը կա  նորմալ հարաբերություն, ես բոլորի հետ էլ նորմալ շփվում եմ, իրանք ինձ հարգում են:

-Գողականնե՞րը:

-Բոլորը` ե'ւ գողական, ե'ւ թեկուզ խուլիգան, թեկուզ հեղինակություն ունեցող մարդ, իմ հարաբերությունը բոլորի հետ նորմալ ա, ես նորմալ շփվում եմ եւ թույլ չեմ տա, որ ինձ չհարգեն, որովհետեւ ես սխալ չեմ պահում ինձ, չեն էլ կարող չհարգել:

-Պարո'ն Սեդրակյան, իսկ ինչո՞ւ է միշտ Ձեր անունը կապվում խուլիգանությունների, հանցագործությունների, քրեական ինչ-որ պատմությունների հետ:

-Գիտեք, եթե մարդը նորմալ մարդ ա, ունի թասիբ, բա մեկ-մեկ էլ կարող ա տենց բաների մեջ մտնի, ընկնի: Ասենք` մենք իրար հետ խոսում ենք, վաղը տեսնեմ ինչ-որ մեկը ձեր նկատմամբ անշնորհքություն ա անում, ես չեմ միջամտելո՞ւ, կամ եթե շատ վատ պահի՝ պատժեմ, ինչի չէ որ: Բա, այ տենց Ձեզ, Ձեր կողքիններին, մեր հարեւաններին պաշտպանալու, պահելու համար կարող ա նաեւ մեկ-մեկ այդպիսի բաների մեջ էլ ընկնենք:

-Արդարացվա՞ծ է, այսինքն:

-Ոնց կարա արդարացված չլինի, հո ես չեմ կարա գնամ` ինքս բան ման գամ: Էլի եմ ասում` վաղը տեսնեմ Ձեր նկատմամբ մեկն ինչ-որ մի սխալ պահվածք, կամ, ասենք, Ձեզ հայհոյի, կամ, ասենք, Ձեզ նեղացնի, անպայման ես խառնվելու եմ, որովհետեւ մտածելու եմ՝ ոնց կարելի ա կնոջը նեղացնել: Իսկ եթե արդեն կինը թույլ ա տալիս, դա ուրիշ խնդիր ա: Բայց ստից տեղը գան Ձեզ նեղացնեն, ես կանգնած լինեմ, ո՞նց կարող եմ չմիջամտել կամ թեկուզ չպատժել: Թասիբն ա մեր մեջ խոսում:

-Պարո'ն Սեդրակյան, հատկապես ընտրական փուլում է շատ շրջանառվում Ձեր անունը, եւ ասում են, որ նախագահը, ՀՀԿ-ն, իշխանությունները հենվում են Ձեզ վրա, Ձեր հեղինակության, հնարավորությունների…

-Եթե իմ կարգի մի քանի հոգի մարդ լինի, էն որ ես ունեմ էդ հեղինակությունը կամ նորմալ շփումները, ամեն ինչ նորմալ կլինի: Իսկ ինչի՞ չպետք ա իմ վրա հենվեն: Ո՞ր կուսակցությունը չի ուզենա իմ նման մի քանի հոգի կուսակցության անդամ ունենա, հաստատ կուզենան: Էն որ ստից խոսում են, բամբասում են, էդ էն խաղողի ու աղվեսի պատմությունն ա, որ աղվեսի դունչը խաղողին չի հասնում՝ ասում ա` խակ ա: Բոլոր կուսակցություններն էլ կուզենան իմ կարգի մի հոգի գոնե ունենան: 

-Շատ է քննարկվում նաեւ Ձեր խոսելաձեւը...

-Ես չեմ կարա խոսամ նենց, ոնց որ խոսում ա ինչ-որ մի գեղից եկած, լեզվի վրա աշխատած մարդ, գեղացի ինչ-որ մեկը: Ես քաղաքի տղա եմ: Մարդիկ գեղերից գալիս են, կարտոլը ծախում են, մտնում են դասախոսի հետ պարապում են իրանց լեզվի վրա, իրանց վրա աշխատում են, հետո գալիս են քննադատում են, թե Սեդրակյանը չասեց այսպես, ասեց՝ սենց: Ես քաղաքի տղա եմ, ես իմ ոճը չեմ փոխի, ոնց որ մեր Կարեն Սերոբիչը, ինքն էլ քաղաքի տղու ոճի մեջ էր խոսում:

-Բայց Դուք վիրավորում եք գյուղի մարդկանց:

-Գյուղը ուրիշ ա, գեղացին ուրիշ ա, գյուղացի մենք շատ լավ ընկերներ ունենք, բայց գեղացի... Չեմ էլ ուզենա դրանց տիպը տենամ, որովհետեւ դրանք տենալու բան էլ չեն:

-Բայց շատ հաճախ Ձեր կուսակցությունից են այդ մարդիկ, ովքեր կուլիսային խոսակցություններում են շահարկում Ձեր խոսելաձեւը եւ այլն:

-Էդ կարգի մարդիկ, որ միամիտ դուրս գամ իրանց դեմը երեւի կմահանան, ո՞նց կարելի ա իմ հետեւից խոսալ: Եթե տղամարդ են, թող գան իմ դեմը ասեն, որ ես իրանց որակավորեմ, թե որ սորտի մարդ են, ինչքան եսիմ ինչեր են արել: Հետեւից ամեն ինչ էլ կարող են խոսալ, ասա` դեմդ կանգնեն, խոսան: Ես բոլորի պատմությունը գիտեմ, իմ առավելությունը հենց դա ա, որ ես շատ-շատ մարդկանց գիտեմ` իրանց ով լինելը, ինչով են զբաղվել, ինչ են արել, ես բոլորին համարյա ճանաչում եմ:

-Չե՞ք կարծում, որ քաղաքականության մեջ շատ արժեքներ վերացել են… Իրար քծնում են, իրար հետեւից խոսում…

-Էդ քծնանքն իմ վրով չի, ես էդ կարգի բաներ չեմ կարող անել: Իսկ խոսալ... Եթե անգամ մեկի հետեւից բան եմ խոսում, որ գալիս ա, եթե ասած էլ չեմ լինում, ասում եմ՝ հիմա քեզ ոնց ա պետք՝ ասեմ` ասե՞լ եմ, թե՞ չեմ ասել: Ես տենց բաներ չունեմ, եթե մի բան ասեցի հետեւներից, ուրեմը հաստատ դեմը ասելու եմ: Ես տենց խնդիրներ չունեմ, ես էլի եմ ասում՝ իմ ճակատը պարզ ա, ես իմ կյանքը նորմալ եմ ապրել, մաքուր եմ ապրել եւ իմ սաղ կյանքում լավություն եմ արել: Ես էնքան համախոհներ ունեմ, որի արդյունքը ցույց են տալիս ընտրությունները:

Զրուցեց Ագնեսա Խամոյանը