Սարոյանի տան գնորդն ամերիկացի է

Տեղեկացրել էինք, որ Վիլյամ Սարոյանի՝ Ֆրեզնոյում գտնվող տունը վաճառվել է: Մինչ այդ տունն աճուրդի էր հանվել 110 000 դոլարով: Աճուրդը կայացել է, տունը գնել են 162 000 դոլարով:

ՀՀ սփյուռքի նախարար Հրանուշ Հակոբյանը կանխավ հանդես էր եկել կոչով, որ դրսի հայերից մեկը փորձի գնել այն: Սփյուռքի նախարարության մամուլի և հասարակայնության հետ կապերի վարչության պետ Էվելինա Բաղդասարյանը yerkir.am-ի հետ զրույցում նշեց, թե իրենք տեղյակ են, որ տունը գնվել է, և հետևել են գործընթացին:

«Տունը, ճիշտ է, գնել է մի ամերիկացի, սակայն պետք է ասեմ, որ նախարարի կոչին արձագանքող էլ է եղել: Հիմա Սարոյանի տունն ունի նոր սեփականատեր, բայց մենք ինչ-ինչ գործընթացներ ենք անում»,- նշեց նա` հավելելով, որ այս պահին ավելին ասել չի կարող:

Հիշեցնենք, որ այդ տանը գրողն ապրել է 17 տարի, այսինքն՝ տան կառուցումից՝ 1964 թվականից, մինչեւ իր մահը՝ 1981 թվականը: