Հայաստանում աղբահանումը կազմակերպելու համար 3,5 միլիոն եվրոյի վարկ են վերցնում

Այսօր ԱԺ արտաքին հարաբերությունների մշտական հանձնաժողով նիստում քննարկման դրվեց մի համաձայնագիր, ըստ որի` Վերակառուցման և զարգացման եվրոպական բանկը (ՎԶԵԲ) ՀՀ-ին տրամադրում է 3,5 միլիոն եվրոյի վարկ: Վարկի նպատակն է աջակցել ՀՀ-ին կոշտ կենցաղային աղբի հավաքման ծախսերի ֆինանսավորման, թափոնների հավաքման, բեռնատարների, թափոնների համար կոնտեյներների ու արկղերի ձեռք բերման, ինչպես նաև աղբավայրի կառուցման համար:

ՏԿԱԻ նախարարի տեղեկալ Վաչե Տերտերյանը կարծիք հայտնեց, որ ինքը բիզնեսի տեսանկյունից հաստատ չէր անի այդ ծրագիրը, որովհետև բիզնես հետաքրքրությունները սպանում են: «Կանեի, եթե կարողանայի որակյալ ծառայություն մատուցել, սակագին բարձրացնել: Վերջին հաշվով` աղբահանությունը հանրային, պետական խնդիր է: Փորձել ենք ծրագիրը մշակել այնպես, որ չբարձրացնենք գինը, հակառակ դեպքում` ավելի լավ աղբահանություն կունենայինք ու կբարձրացնեինք: Գոնե այս պահին, երբ ծրագիրը մշակել ենք, խնդիր է դրվել առաջիկա 5 տարվա համար չբարձրացնել գինը: Իսկ պատկերացնելի լավագույն սահմանը, եթե անգամ բարձրանա 6 կամ 7 տարի անց, կլինի 400-450 դրամ»,- ասաց նա՝ հավելելով, որ վարկը նպաստելու է Հայաստանում աղբահանման գործընթացի կազմակերպմանը:

«Ֆինանսական ներգրավման խնդիր չունենք: Իրականում խնդիրն ակնհայտ է, որ մենք երկրում ունենք աղբահանության կազմակերպման խնդիր: Ես կարծում եմ, որ հրատապ է, ըստ իս` աղբահանության չկազմակերպման խնդիրը դարձել է էկոլոգիայի և մշակույթի խնդիր»,- հավելեց փոխնախարարը:

Նա նաև նշեց, որ այս պահին Հայաստանում աղբահանությամբ զբաղվող ընկերությունները գործում են առանց լիցենզիայի:

«Այս ծրագիրը մենք պետք է մեծացնենք և պետք է բանակցենք, որպեսզի Գեղարքունիքի մարզը բերենք այս ծրագրի մեջ, որովհետև Սևանն աղբի ձևավորման գործում ամենամեծ տարածքն է զբաղեցնում, ուստի` Սևանի ավազանի բոլոր համայնքները պետք է միացնենք այս ծրագրին»,- ասաց Տերտերյանը և հավելեց, որ Հայաստանում աղբահանման գործընթաց կազմակերպելը բավական բարդ գործընթաց է: «Աղբահանման գործընթացը բարդ է` կախված ճանապարհների, երկաթուղու բացակայության հետ: Համենայն դեպս, ինչ-որ սխեմաներ արդեն երևում են»,- եզրափակեց նա: