ԵՄ-ն 3,7 միլիոն եվրոյի գեներատորներ է ուղարկել Ուկրաինա՝ էլեկտրաէներգիայից զրկված 1 միլիոն մարդու համար

Եվրոպական հանձնաժողովը հայտարարել է ԵՄ ռազմավարական պահուստներից Ուկրաինային 3,7 միլիոն եվրոյի 447 վթարային գեներատոր ուղարկելու մասին՝ նշելով, որ երկրի էներգետիկ ենթակառուցվածքներին ռուսական հարվածների պատճառով 1 միլիոն ուկրաինացի գտնվում է առանց էլեկտրաէներգիայի, ջրի և ջեռուցման։ «Արմենպրես»-ի փոխանցմամբ՝ այս մասին հայտարարություն է տարածել Եվրոպական հանձնաժողովը։

Այդ գեներատորները կօգտագործվեն Ուկրաինայում հիվանդանոցներում, ապաստարաններում և կարևորագույն ծառայություններ տրամադրող կառույցներում էլեկտրաէներգիան վերականգնելու համար։

«Լեհաստանում տեղակայված rescEU ռազմավարական պահուստներից մոբիլիզացված գեներատորներն առավել տուժած համայնքներին կբաշխվեն Ուկրաինայի համայնքների և տարածքների զարգացման նախարարության կողմից՝ համագործակցելով Ուկրաինայի Կարմիր խաչի հետ», - ասվում է հայտարարության մեջ։

Եվրոպական հանձնաժողովը բացատրել է, որ այս որոշումը նպատակ ունի բավարարել անհապաղ կարիքները և հանդիսանում է ԵՄ-ի կողմից Ուկրաինայի էներգետիկ կայունությանը շարունակական աջակցության մի մասը։

Ըստ հայտարարության՝ Ռուսաստանի լայնածավալ հարձակումից ի վեր ԵՄ-ն Ուկրաինա է ուղարկել գրեթե 10 000 գեներատոր։

Նշվում է նաև, որ ձմռան նախաշեմին Եվրոպական հանձնաժողովը նաև ավարտեց Լիտվայի կողմից նվիրաբերված ամբողջական ջերմաէլեկտրակայանի տեղափոխումը: Սա քաղաքացիական պաշտպանության մեխանիզմի պատմության մեջ ամենամեծ համակարգված լոգիստիկ գործողությունն էր և հնարավորություն տվեց վերականգնել Ուկրաինայի էլեկտրացանցի կարևորագույն հզորությունները։

Բացի այդ, ըստ հայտարարության, ՌԴ-ի կողմից ռազմական գործողությունների մեկնարկից ի վեր Եվրոպական հանձնաժողովն Ուկրաինայի քաղաքացիական բնակչությանը պաշտպանելու համար հատկացրել է ավելի քան 1,2 միլիարդ եվրոյի մարդասիրական օգնություն և ԵՄ Քաղաքացիական պաշտպանության մեխանիզմի միջոցով մատակարարել է ավելի քան 160 000 տոննա օգնություն։

Բացի հումանիտար օգնությունից, Ուկրաինային տրամադրվել է առնվազն 3 միլիարդ եվրո՝ էներգետիկ անվտանգությունն ապահովելու համար: Ձմռան նախաշեմին Եվրահանձնաժողովը նաև մոբիլիզացրել է 927 միլիոն եվրո գազի արտակարգ գնումների համար։