Ակցիզային հարկով հարկման ենթակա որոշ ապրանքների իրացումն արգելելու մասին օրենքի նախագիծը հաստատվեց

Կառավարության այսօրվա նիստում ֆինանսների փոխնախարար Վախթանգ Միրումյանն իր ելույթում ներկայացրեց ակցիզային հարկով հարկման ենթակա որոշ ապրանքների դրոշմավորման համար «2011» թվագրմամբ ակցիզային դրոշմանիշերը կիրառությունից հանելու և «2011» թվագրմամբ ակցիզային դրոշմանիշերով դրոշմավորված ապրանքների իրացումն արգելելու մասին որոշման նախագիծ:

Միրումյանի ներկայացմամբ` վերոնշյալ նախագիծը առաջարկում է 2015 թվականի հուլիսի 1-ից կիրառությունից հանել Հայաստանի Հանրապետություն ներմուծվող կամ Հայաստանի Հանրապետությունում արտադրվող` ակցիզային հարկով հարկման ենթակա որոշ ապրանքների դրոշմավորման համար «2011» թվագրմամբ ակցիզային դրոշմանիշերը, ինչպես նաև սահմանել, որ 2016 թվականի հունվարի 1-ից ՀՀ-ում արգելվի Հայաստանի Հանրապետություն ներմուծված կամ Հայաստանի Հանրապետությունում արտադրված` «2011» թվագրմամբ ակցիզային դրոշմանիշերով դրոշմավորված արտադրանքի իրացումը:

Վախթանգ Միրումյանը նշեց, որ որոշ ալկոհոլային խմիչքների ոլորտում դեռևս առկա է այդ բացը:

Վարչապետ Հովիկ Աբրահամյանը հանձնարարեց կարգավորել ոլորտի բացերը և նշեց, որ որոշման նախագիծը հաստատվում է: