Վախեցիր նվեր անող դանայացիներից. ԲՀԿ-ականի ակնարկը՝ Ծառուկյանի փեսայի նշանակման մասին

Արդեն տեղեկացրել ենք, որ կառավարության այսօրվա նիստում Կարապետ Գուլոյանը նշանակվեց Կոտայքի մարզպետ: Կարապետ Գուլոյանը ԲՀԿ նախկին ղեկավար Գագիկ Ծառուկյանի փեսան է և ԱԺ պատգամավոր Մուրադ Գուլոյանի որդին: Ուշագրավ է, որ Կարապետ Գուլոյանի այս նշանակումը հաջորդեց ԲՀԿ-ի և Գագիկ Ծառուկյանի անձի շուրջ տեղի ունեցած վերջին խմորումներին:

Yerkir.am-ը ԲՀԿ-ականներից փորձեց պարզել, թե արդյո՞ք սպասելի էր իրենց արդեն նախկին կուսակցի նշանակումը նման պաշտոնի:

ԲՀԿ-ական պատգամավոր Լյովա Խաչատրյանըն ասաց, որ մեզանից է տեղեկանում Գուլոյանի նշանակման մասին, հետո հավելեց. «Միգուցե քաղաքապետ աշխատելու ժամանակ նորմալ աշխատել է, արդարացրել է իրեն, հետևաբար` արժանի է: Ես Աբովյան քաղաք մտնելիս երբևէ տհաճ բաների ականատես չեմ եղել: Ամեն ինչ մաքուր է, կազմակերպված»:

Դիտարկմանը, թե հնարավոր է` այս նշանակումը նվեր էր Ծառուկյանին, Խաչատրյանն արձագանքեց. «Վախեցիր նվեր անող դանայացիներից»: Հարցին, թե ինչո՞ւ մեջբերեց այդ թեւավոր խոսքը, նա պատասխանեց. «Չեմ կարծում, որ նվերի խնդիր կա»: