Ամեն ինչը հիմա անցնում է Մելիք-Ադամյան փողոցով. ՀՀԿ-ականը՝ Ծառուկյանի փեսայի նշանակման մասին

ԱԺ ՀՀԿ խմբակցության պատգամավոր Սուքիաս Ավետիսյանը նորմալ է համարում Կոտայքի մարզպետի պաշտոնում Գագիկ Ծառուկյանի փեսայի` Կարապետ Գուլոյանի նշանակումը: Yerkir.am-ի հետ զրույցում նա ասաց. «Հարմար են գտել նրան նշանակել այդ պաշտոնում: Գործող քաղաքապետ է, նպատակահարմար են գտել նրան նշանակել»:

Մեր այն հարցին, թե ինչո՞ւ հենց այս պահին որոշեցին նրան նշանակել Կոտայքի մարզպետ, ՀՀԿ-ական պատգամավորը հստակ պատասխան չուներ: «Թեկնածուները շատ են եղել, նախկին մարզպետին` Արամ Հարությունյանին, որոշել են տեղափոխել այլ աշխատանքի, հարմար են գտել մարզպետի պաշտոնում Կարապետ Գուլոյանին նշանակել»,- ասաց նա:

Դիտարկմանը, թե զուգադիպություններ չի՞ նկատում ինչ-ինչ իրադարձությունների հետ, Սուքիաս Ավետիսյանը պատասխանեց. «Հա ի՞նչ վատ է որ: Թող լինեն զուգադիպություններ: Զուգադիպությունը վատ բան չէ... Այն խոշոր քաղաքներում, որտեղ քաղաքապետերը լավ են աշխատում, չի խանգարում, որ հետագայում նրանք իրենց ուժերը փորձեն մարզպետի պաշտոնում»:

Փաստորեն, իսկապե՞ս բարձր պաշտոնների նշանակման ճանապարհն անցնում է Մելիք-Ադամյան փողոցով, ինչպես վստահեցնում էր ՀՀԿ խոսնակ Էդուարդ Շարմազանովը: Սուքիաս Ավետիսյանին հարցը դուր եկավ: «Նու, ընդհանրապես ամեն ինչը հիմա անցնում է Մելիք-Ադամյան փողոցով»,- ասաց պատգամավորը: