ԲՀԿ-ն դեպի անկում է սահել. նախկին ԲՀԿ-ականի համար կանխատեսելի էր կուսակցության այսօրը

Այսօր Yerkir.am-ի հետ զրույցում դեռևս ԲՀԿ-ական Վահան Բաբայանն ասել էր, որ պատրաստվում է լքել կուսակցության շարքերը, քանի որ իր քաղաքական հայացքները տարբերվում են ԲՀԿ ղեկավարի որդեգրած քաղաքականությունից:

ԲՀԿ-ն լքած պատգամավոր Արագած Ախոյանն ուզում է հավատալ, որ ոչ բոլորը դուրս կգան ԲՀԿ-ից: «Գիտենք, որ քաղաքական տրավմայից հետո ԲՀԿ-ն, բնականաբար, կունենար վերադասավորման խնդիր, քաղաքական կուրսի որդեգրման խնդիր: Ուղղակի դա բնական եմ համարում»,- Yerkir.am-ի հետ զրույցում, խոսելով ԲՀԿ-ում տիրող իրավիճակի մասին, նշեց պատգամավորը:

Նրա կարծիքով` ԲՀԿ-ի դեպքում խելամիտ որոշումը ընդդիմադիր դաշտում մնալն է: «ՀՅԴ-ի համար ճիշտը իշխանությունների հետ համագործակցելն էր, որովհետև 125 տարվա կուսակցություն է, ունեն կայուն ընտրազանգված և ճիշտ վարվեցին, որ որոշեցին պատասխանատվության բեռը կիսել այս ծանր պահին, բայց ԲՀԿ-ի դեպքում... Մենք գիտենք, որ ԲՀԿ-ի ծաղկուն շրջանն արդեն անցել է, մենք գիտենք ինչ տրավմա տարավ ԲՀԿ-ն անցյալ տարի և այսօր պետք է հնարավորինս կարողանա պահել կուսակցության շունչը, դիրքը, այլ ոչ թե մաս կազմել իշխանությանը»,- ասաց պատգամավորը՝ հավելելով, որ ԲՀԿ-ն այսօր պատրաստ չէ իշխանությունների հետ համագործակցելուն:

Արագած Ախոյանը նշեց՝ ակնհայտ է փաստը, որ «ԲՀԿ-ն դեպի անկում է սահել», բայցեւ կարծում է, որ «ինչ-որ մի բան կմնա»:

Նրա խոսքով՝ Ծառուկյանի գործոնը շատ մեծ դեր է խաղացել այդ կուսակցության հարցում, ԲՀԿ-ն ձևավորվել էր Գագիկ Ծառուկյանի առանցքի շուրջ, սակայն եղավ այն, ինչ եղավ, և Ծառուկյանի` քաղաքականությունից դուրս գալը մեծ հարված եղավ ԲՀԿ-ի համար:

Ինչ վերաբերում է Արագած Ախոյանի քաղաքական ապագային, պատգամավորը նշեց, որ դեռ ոչ մի որոշում չունի: Հարցին, թե հնարավո՞ր է, որ ընդգրկվի ՀՀԿ ցուցակում, պատգամավորը պատասխանեց, որ բացառված չէ: