«Եթե Մոսկվան խորհրդակցեր մեզ հետ, թե ինչ տեսակի զենք վաճառել Բաքվին...»

ՀՀ փոխվարչապետ Վաչե Գաբրիելյանը հարցազրույց է տվել ռուսական Лента.ру-ին՝ խոսելով ռուս-հայկական հարաբերությունների, եվրասիական ինտեգրման, Գյումրիի ողբերգության, շփման գծում իրավիճակի մասին և այլն:

Անդրադառնալով Ռուսաստանի կողմից Ադրբեջանին զենք վաճառելուն` ռուս-հայկական հարաբերությունների համատեքստում՝ Գաբրիելյանն ասել է, որ Հայաստանի համար դա շատ լուրջ հարց է: «Զենքը, որը ՌԴ-ն վաճառում է Ադրբեջանին, կարող է օգտագործվել մեր դեմ: Հասկանալի է, որ Ադրբեջանը, միևնույն է, կգներ զենք, եթե ոչ` ՌԴ-ից, ապա` այլ երկրից: Մյուս կողմից՝ եթե Մոսկվան խորհդակցեր մեզ հետ, թե ինչ տեսակի զենք վաճառել Բաքվին, մեր հասարակությունն ավելի հանգիստ կընդուներ այդ փաստը: Մեր ժողովուրդը հարց է բարձրացնում՝ ո՞վ է մեր դաշնակիցը: Այդ հարցը տալիս են թե' պաշտոնյաները, թե' սովորական մարդիկ»,- ասել է նա:

Խոսելով շփման գծում լարված իրավիճակի մասին՝ փոխվարչապետը նշել է. «Այդ խնդիրը կապված է հենց Բաքվի կողմից զենք գնելու հետ: Բաքուն մշտապես յուղ է լցնում կրակի վրա: Իսկ Հայաստանը ոչ մի պատճառ՝ ո'չ ռազմավարական, ո'չ տնտեսական, չունի հակամարտությունը սրելու համար: Ադրբեջանին անհրաժեշտ է թշնամու կերպար: Այդ կերպ են երկրի իշխանությունները համախմբում և մոբիլիզացնում իրենց ժողովրդին»: