Իրեն հայ կոչելու համար ՝ Անկարայի քաղաքապետը դատի է տվել պոլսահայ լրագրողին

Անկարայի քաղաքապետ Մելիհ Գյոքչեքը, ով  Twitter-յան իր էջում պահանջել է փոխվարչապետ Բյուլենթ Արընչի հրաժարականը, մի նոր սկանդալի հերոս է դարձել:

Ըստ Hurriyet-ի՝ իրեն հայ անվանելու համար Գյոքչեքը դատական հայց է ներկայացրել ստամբուլահայ լրագրող, գրող Հայկո Բաղդատի դեմ, ով երկրի փոխվարչապետի հրաժարականը պահանջելու կապակցությամբ Գյոքչեքի մասին Twitter-ում գրել է. «Գյոքչեքը հայ է: Մայրաքաղաքը հանձնել են հայի։ Ափսոս»:

Գրառումից հետո Անկարայի քաղաքապետը դիմել է դատարան՝ պնդելով, որ իրեն վիրավորել են` հայ անվանելով:

«Ժողովրդի կողմից այդքան սիրված,  հարգված մեկի հանդեպ գարշանք պարունակող իմաստով օգտագործվող նման բառ ասելը անձնական վիրավորանք է»,- նշվել է Մելիհ Գյոքչեքի փաստաբանի հայտարարության մեջ։

Անկարայի քաղաքապետը պոլսահայ լրագրողից պահանջում է 10.000 լիրա դրամական փոխհատուցում: