Սպառնում են հայկական գյուղի վաճառքը լուսաբանած պոլսահայ լրագրողին. հարցազրույց

Վերջերս մեծ աղմուկ էր բարձրացրել պոլսահայ լրագրող Արիս Նալջըի արձագանքը հայկական գյուղի (նախկինում հայկական գերեզմանատան տարածք) վաճառքի վերաբերյալ` թուրքական T24-ում հրապարակված լուրին: Այն մեծ ուշադրության էր արժանացել ոչ միայն թուրքական, այլ նաև հայկական լրատվամիջոցներում: Գուցե հենց այդ պատճառով թուրքական Sabah պարբերականը շտապել է հերքել լուրն ու մեղադրել հայկական լրատվամիջոցներին՝ հերթական անգամ կիրառելով «բառախաղի»` իրենց հմտությունները:

Համաձայն Sabah-ում հրապարակված լուրի՝ հայերը շուրջ 700 տարի ապրել են Բուրսա շրջանի Քարսաք գյուղին հարակից Գյուվենլի գյուղում, սակայն «գանձ որոնողներին գրավիչ դարձնելու նպատակով» է անշարժ գույքի գործակալը նախընտրել այն ներկայացնել որպես հայկական գյուղ: Այսինքն` կայքն ուզում է համոզել, որ, այո', հայերն այնտեղ ապրել են, բայց դա դեռ չի նշանակում, որ տարածքը հայերինն է:

Կայքը շտապել է «մեղավոր ճանաչել» անգամ հայկական լրատվամիջոցներին՝ վաճառքի հանված տարածքները որպես հայկական գյուղ ներկայացնելու համար:

Այս ամենից հետո համացանցում լուրեր են տարածվել պոլսահայ լրագրողին սպառնալու վերաբերյալ:

Լուրերի հավաստիությունը ճշտելու նպատակով Yerkir.am-ը հարցազրույց է արել պոլսահայ լրագրող, IMC հեռուստաընկերության խմբագիր Արիս Նալջըի հետ:

- Ձեզ սպառնալու վերաբերյալ լուրեր են տարածվել: Ովքե՞ր են սպառնում և ինչո՞վ:

- Լուրի հրապարակումից հետո քննիչներն այցելել են այդ գործակալություն (անշարժ գույքի- խմբ.): Ասել են՝ ինչպե՞ս կարող եք գերեզմանատունը վաճառել: Գործակալության սեփականատերն ու աշխատակիցները մի քանի անգամ զանգահարեցին և նամակ ուղարկեցին ինձ՝ զգուշացնելով չգնալ գյուղ (Բուրսա):

- Թուրքական Sabah-ը հերքում է գյուղի` հայկական լինելու մասին լուրը և պնդում, որ հայտարարությունը պարզապես ուշադրություն գրավելու համար է եղել:

- Այո: Սակայն, լուրը հերքելով, իրականում հաստատում են այն:

- Այսի՞նքն:

- Ասում են` գյուղը հայկական է եղել, բայց նախկինում…( Sabah` հայերը շուրջ 700 տարի ապրել են Գյուվենլի գյուղում):

- Դուք պատրաստվո՞ւմ եք նրանց լուրի դեմ նոր հոդված հրապարակել կամ Ձեր լուրի հավաստիության մասին ինչ-որ փաստ ներկայացնել:

- Ես մտադրված չեմ նրանց ուշադրություն դարձնել: Այդ լուրն արված է, որպեսզի Sabah-ի «գյուղացիներն» իրենք իրենց ապահով զգան (ծիծաղում է): Թող քարտեզը նայեն:

- Չե՞ք վախենում սպառնալիքներից: Դրանց դեմ ինչ-որ բան ձեռնարկե՞լ եք:

- Չեմ վախենում, բայց այդ հարցով արդեն դիմել եմ իմ փաստաբաններին: Նրանք կզբաղվեն դրանով: Յորաքանչյուրն էլ փոքր-ինչ վախենում է: Կարծում եմ՝ դա մարդկային արձագանք է նման երևույթներին: Ինչ կատարվում է, մարդկային իրավունքներին հարիր չէ:

- Կարծում եմ` այս լուրի` մեծ արձագանքի արժանանալը հատկապես կապված է ճիշտ ժամանակ ընտրելու հետ: Հատկապես վերջին շրջանում թուրքական բոլոր լրատվամիջոցները Հայոց ցեղասպանության, հայերի, Հրանտ Դինքի և Լեռնային Ղարաբաղի մասին լուրերով են ողողված…

- Այո, այդպես է:

Yerkir.am-ի խնդրանքով Նալջըն անդրադարձավ նաև Թուրքիայում Գեզի համալսարանի և Ադրբեջանի դեսպանատան կողմից նախաձեռնված` «Հայերի իրագործած ցեղասպանությունը» խորագրով մրցույթին, որի արդյունքների հրապարակման ամսաթիվ են ընտել «Ակօս» թերթի խմբագիր Հրանտ Դինքի սպանության օրը՝ հունվարի 19-ը:

- Պատահակա՞ն է արդյոք, որ այդ մրցույթի արդյունքները հայտնելու համար ընտրել են հենց Հրանտ Դինքի սպանության օրը:

- Ադրբեջանցիները միշտ էլ այդպես են անում: Իրենց օրակարգը Թուրքիայի ազգայնամոլական օրակարգի հետ համատեղելու նպատակով նման ամսաթվեր են ընտրում: Սա էլ դրանցից մեկն է:

Հիշեցնենք, որ Գեզի համալսարանն ու Ադրբեջանի դեսպանատունը այդ «փայլուն» միտքն են հղացել այն բանից հետո, երբ Թուրքիայում մի խումբ հայտնի մարդիկ` լրագրողներ, մտավորականներ, մաթեմատիկոսներ, ստորագրահավաք են սկսել՝ հակահայ հայտարարություններով և կեղծված պատմություններով ողողված պատմության դասագրքերը հավաքելու և հայ ուսանողներից ներողություն խնդրելու պահանջով: Ի դեպ, սպառնալիքներ են ստացել նաեւ ստորագրահավաքին միացած երկու հայամետ լրագրողներ` Մուրաթ Բելգեն և Ադըն Էնգինը: 

Հարցազրույցը՝ Արազ Գայմագամեանի