Արամ Աթեշյանը եկեղեցուց դուրս է հանել իրեն բոյկոտող պոլսահայ կնոջը, ով հետո ձերբակալվել է

Պոլսի  Ֆերիքոյ շրջանի Սուրբ Վարդանանց եկեղեցում պոլսահայ կինը բոյկոտել է Հայոց պատրիարքի փոխանորդ վերանշանակված Արամ Աթեշյանի եկեղեցական քարոզը, ինչի պատճառով նախ դուրս է հրավիրվել եկեղեցուց, ապա՝ ձերբակալվել:

Ըստ «Ակօս»-ի՝ հայտնի է դարձել, որ Արամ Աթեշյանին բոյկոտողը գրող Բեսսե Քաբաքն է, ով Աթեշյանի քարոզի սկսվելու պահին իր բողոքն է արտահայտել՝ Աստվածաշունչը ձեռքին բռնած, բարձր աղոթելով: Աթեշյանը պահանջել է դուրս հանել Քաբաքին քարոզը սկսել կարողանալու համար:

Քաբաքը եկեղեցու մոտ կանգնած ոստիկանների կողմից բաժանմունք է տարվել և բաց թողնվել միայն Աթեշյանի քարոզի ավարտից հետո՝ մոտ մեկ ժամ անց: Բաժանմունքում եղած ժամանակ ոստիկանները Քաբաքին հեգնել են՝ ասելով. «Դուք մեր հյուրն եք»:

Հիշեցնենք, որ Ստամբուլի նահանգապետարանի կողմից հրապարակված նամակից հետո եկեղեցական նիստ էր գումարվել, որի ժամանակ Պոլսի հայոց պատրիարքի փոխանորդ էր վերանշանակվել Արամ Աթեշյանը, իսկ Գարեգին արքեպիսկոպոս Բեքչյանը  Սահակ եպիսկոպոս Մաշալյանին բանավոր կերպով հայտնել է իր` հրաժարական տալու մտադրության մասին: