Լարվածություն, բնականաբար, կա, իսկ Ադրբեջանը փորձում է սադրել. պաշտպանության փոխնախարար

Այսօր պաշտպանության փոխնախարար Արա Նազարյանից լրագրողները հետաքրքրվեցին սահմանին տիրող վիճակի մասին: Լրագրողները հարցրեցին. «Ինչո՞ւ են առաջնագծում զոհվում 18-19 տարեկան զինվորները, և ինչո՞ւ փորձառու պայմանագրային զինծառայողները չեն կանգնած առաջնագծում»:

«Սահմանին կանգնած են փորձառու անձինք, բոլորն էլ փորձառու են, պատահական մարդ էնտեղ չի կարող կանգնել: Հակառակորդի սադրանքները հիմա փորձում եք վերագրել մե՞զ»,- արձագանքեց Արա Նազարյանը՝ հավելելով, որ Ադրբեջանն իր զոհերի պատկերը փակել է ու չի ասում, իսկ ՀՀ ՊՆ-ն անում է հնարավոր ամեն ինչ սահմանների պաշտպանունակության ամրապնդման համար:

Հարցին, թե ներկա պահին ի՞նչ վիճակ է տիրում սահմանին, պատասխանեց. «Վերահսկվում է: Լարվածություն, բնականաբար, կա, որը կապված է առաջիկա` ՄԽ միջոցառումների հետ, իսկ Ադրբեջանը փորձում է սադրել»:

Իսկ հարցին, թե արդյո՞ք լարվածությունը կտանի լայնամասշտաբ պատերազմի, փոխնախարարը պատասխանեց. «Իմ անձնական կարծիքով` պատերազմ չի սկսվի, դա իրենց ձեռնտու չէ»:

Հարցին, թե ինչպե՞ս է պատրաստվում հայկական կողմը հակադրվել Ադրբեջանի՝ ամենօրյա դիվերսիաների միջոցով ուժերը ջլատելու ռազմավարությանը, Արա Նազարյանը պատասխանեց, որ խաղաղ կարգավորման գործընթացում Հայաստանն ազնիվ է և անում է հնարավորը, որպեսզի կոնֆլիկտի խաղաղ հանգուցալուծման գործընթացը պահպանվի:

Մեր հարցին, թե արդյո՞ք սահմանի լարվածության մասին Սեյրան Օհանյանը խոսել է ՀԱՊԿ նախագահ Նիկոլայ Բորդյուժայի հետ, պատասխանեց. «Ես տեղյակ չեմ` ինչ են խոսել»: