Մենք շատ խաղաղ մարդիկ ենք. բելառուսցին հերքեց Ադրբեջանին զենք վաճառելու մասին լուրը

ԱՊՀ միջխորհրդարանական վեհաժողովի կողմից անցկացվող «Հիշատակի էստաֆետ» ակցիայի շրջանակում ԱՊՀ ՄԽՎ պատվիրակության անդամներն այսօր այցելել են «Մայր Հայաստան» հուշահամալիր, որից հետո բելառուսական պատվիրակության անդամ Թամարա Դոլգոշեյը հանդես է եկել մամուլի ասուլիսով: Լրագրողները հետաքրքրվեցին, թե ինչպե՞ս նա կմեկնաբանի լուրերը, թե ոչ միայն Ռուսաստանն է Ադրբեջանին զենք վաճառում, այլ նաև Բելառուսը:

Նա նախ նշեց, թե այդ լուրը չի համապատասխանում իրականությանը: «Ես նույնիսկ չեմ ուզում դա մեկնաբանել, դրանք ուղղակի լուրեր են: Ես երաշխավորում եմ իմ պետության անունից` մենք շատ խաղաղ մարդիկ ենք, բարեկամաբար ենք վերաբերվում և' ռուս, և' հայ ժողովուրդներին: Մենք չենք ունեցել և չունենք հարձակվելու նպատակ, մենք, ինչպես և յուրաքանչյուր խելացի ազգ, միայն պաշտպանվում ենք: Այդ պատճառով այն զինվորական պատրաստությունները, որ անում են, պետք է ամեն երկիր կարողանա ունենալ, միգուցե այդ զինավարժություններն են այդ լուրերի առիթ հանդիսացել»,- ասաց Դոլգոշեյը:

Այնուհետև նա ընդգծեց, որ իրենց երկիրը փորձում է աջակցել ուկրաինացի ժողովրդին, հովանավորչական օգնություն է ցուցաբերում խաղաղ բնակչությանը, և դա է իրականությունը: «Ես չեմ ուզում հիմա քննարկել, թե ինչ պատճառով է ծագել ուկրաինական հակամարտությունը, ով և ինչ է դրա հետևում կանգնած, բայց այնտեղ հաստատապես չկան ո'չ Ռուսաստանը, ո'չ Բելառուսը, ոչ' որևէ այլ երկիր, որ այստեղ ներկա է»,- ասաց բելառուսցի պատվիրակը: