ԱԱԾ պետը հերքեց ԱՄՆ-ից Հայաստան FBL քննիչների ժամանման մասին լուրը

Այսօր ԱԱԾ նորանշանակ տնօրեն Արթուր Վանեցյանը հանդիպում է ունեցել լրատվամիջոցների ղեկավարների հետ:

Հանդիպման ժամանակ Վանեցյանը հերքել է այն լուրը, թե ԱՄՆ հետաքննությունների դաշնային բյուրոյի քննիչները (FBI) ժամանել են Հայաստան` գործողություններ կատարելու կամ որևէ հարցում են ուղարկել Հայաստանի անվտանգության ծառայությանը:

Նշենք, որ  մամուլում լուրեր էին շրջանառվում, որ Հայաստան են ժամանել FBI խմբի քննիչները, և որ Հայաստանում իրականացնում են հետաքննական գործողություններ: Ասվում էր նաև, որ ԱՄՆ քննիչները հետաքրքրված են եղել Հայաստանից ԱՄՆ տեղափոխված ապօրինի գումարներով:

ԱԱԾ նորանշանակ տնօրենը տեղեկացրեց, որ Հայաստանում նախկինում կատարված հանցագործությունների գործող կոռուպցիոն շղթաների հայտնաբերման գործողություններ են իրականացնում:

«Շուտով կբացահայտվեն խոշոր հարստացած մարդիկ, որոնք գործել են կոռուպցիոն սխեմաներով»,- հայտարարեց նա:  

Վանեցյանի խոսքով` այդ սխեմաների շրջանակում որոշ մարդիկ պետությունից տարիներ շարունակ գումար են գողացել ու ապօրինի հարստացել.

«Պետք է գտնենք լուծումներ, որ գումարը հետ վերադարձնեն, ոչ թե գնան բանտ նստեն, քանի որ դա հարցի լուծում չէ: Ակտիվ աշխատանք է ընթանում կոռուպցիայի դեմ։ Ավանդական կոռումպացված հիմնարկները ամբողջությամբ դադարեցրել են հակաօրինական գործունեությունը»,- հայտարարեց նա` մատնանշելով այդ ծառայությունները՝  մաքսային, հարկային, դատական, ոստիկանության որոշ ծառայություններ։