Սիրիահայ գործարարները խնդրում են սառեցնել իրենց վարկային պարտավորությունները

Մի խումբ սիրիահայ գործարարներ այսօր լրագրողների հետ հանդիպման ժամանակ հայտնեցին, որ ՀՀ կառավարության կողմից 2 տարի առաջ հատուկ ծրագրով իրենց տրված վարկային արտոնություններից օգտվելիս բախվում են բազմաթիվ խնդիրների:

Ոսկերիչ Միքայել Կարապետը նշեց, որ ինքն արդեն բավական երկար ժամանակ է, ինչ զբաղվում է բիզնեսով, և բոլորովին էլ անփորձության պատճառով չէ, որ այժմ բազմաթիվ խնդիրներ ունի, և իր բիզնեսները կանգնած են փակման եզրին: «Մենք կառավարությունից խնդրում ենք, որ 6 ամսով կամ մեկ տարով սառեցնեն մեր վարկային պարտավորությունները, որպեսզի մենք կարողանանք մեր ունեցած գումարներով կատարել բազմաթիվ այլ վճարումներ: Հասկանալի է, թե ինչ խնդիրների ենք բախվում փող չունենալու պատճառով: Օրինակ` Սիրիայում, երբ բիզնեսմենը նոր էր սկսում իր գործունեությունը, որոշ ժամանակով ազատվում էր վարկային պարտավորություններից: Այստեղ մեր մի քանի գործընկերներ ստիպված են իրենք անձամբ աշխատել ուրիշների բիզնեսներում, որ կարողանան վարկային պարտավորությունները կատարել»,- նշեց գործարարը:

Մեկ այլ գործարար` Հրաչ Բալ-Մանուկյանը տեղեկացրեց, որ իրենք պատրաստվում են դիմել կառավարություն՝ խնդրանքով` որոշ ժամանակով սառեցնել իրենց վարկային պարտավորությունները: «Մենք չենք կարողանում այլևս աշխատել, եթե որոշ ժամանակով ազատվենք այդ վարկային պարտավորություններից, ավելի լավ վիճակում կհայտնվենք և միայն վնասով չենք աշխատի»,- ասաց գործարարը:

Հարցին, թե շուկայում առկա մրցակցությունը և՞ս կարող է խանգարող հանգամանք հանդիսանալ, և հայ մրցակիցների կողմից կարո՞ղ են լրացուցիչ խնդիրներ առաջ բերվել, գործարարը պատասխանեց. «Նման բան չկա, դա չէ մեր խնդիրը: Պարզապես ներկա տնտեսական վիճակն ամենաանմիջական ազդեցությունն է ունենում մեզ վրա: Մենք խնդրում ենք, որ որոշ ժամանակով սառեցվեն մեր վարկային պարտավորությունները: Մոտ 50-60 գործարար ևս այդ վիճակում է գտնվում, նրանց անունից էլ ենք մենք հանդես գալիս»: