Մենք ստեղծում ենք դաշտ, որտեղ գործարարները հնարավորություն ունեն իրենց պրոբլեմները բարձրացնելու. Մարտին Սարգսյան

Արդեն տեղեկացրել ենք, որ մեկնարկել է ԱՊՀ անդամ երկրների առևտրաարդյունաբերական պալատների ղեկավարների խորհրդի հերթական նիստը:

ՀՀ Առևտրաարդյունաբերական պալատի նախագահ Մարտին Սարգսյանը նիստից առաջ լրագրողների հետ զրույցում նշեց, որ այս համաժողովի ընթացքում Ռուսաստանը նոր ծրագիր է ուզում ներակայացնել, որը վերաբերում է ընդհանուր թեստավորման խնդրին: Սա առնչվում է այն քաղաքացիներին, ովքեր ուզում են աշխատանք գտնել Ռուսաստանում:

«Հայաստանն այս կապակցությամբ մի քանի պրեզենտացիա ունի: Դա վերաբերում է էլեկտրոնային առևտուրն ԱՊՀ երկրներում կազմակերպելու խնդրին և մտավոր սեփականության իրավունքների պաշտպանության հարցերին: Նիստի ընթացքում որոշվելու է, թե որ երկիրն է հաջորդ նիստի նախագահողը: Այս անգամ մենք ենք նախագահող երկիրը, նախորդ անգամ Բելառուսում էր»,- ասաց Սարգսյանը` հավելելով, որ մենք ունենք ընդհանուր ստորագրված հուշագիր, որի շնորհիվ համատեղ իրականացվում են ծրագրեր, որոնք միտված են գործարարության զարգացմանը, համատեղ ձեռնարկությունների ձևավորմանը:

«Մենք ստեղծում ենք դաշտ, որտեղ գործարարներն իրար հետ կարող են հանդիպել, հնարավորություն ունեն իրենց պրոբլեմները բարձրացնելու ու դրանց լուծումները ստանալու: ԵՏՄ անդամ դառնալուց հետո մենք մեծ ներուժ ունենք` այդ շուկաներում ներկայանալու: Աշխատում ենք նաև եվրոպական երկրների հետ»,- ընդգծեց Սարգսյանը: