Թող նախկին նախագահներն իրար հետ շախմատ խաղան, զրուցեն, գուցե նրանց ագրեսիան նվազի. Արծվիկ Մինասյան

ԱԺ արտահերթ նիստում քննարկվում է «ՀՀ նախագահի վարձատրության, սպասարկման և անվտանգության ապահովման մասին» օրենքում լրացումներ եւ փոփոխություն կատարելու մասին հարցը: Մինչ այս` գործող օրենքով, ՀՀ պաշտոնաթող նախագահի գրասենյակի ծախսերը պետության հաշվին են կատարվում, տրվում են համապատասխան բնակարան, ավտոմեքենա և գրասենյակ, առաջին երկուսը տրվում են մինչև նախկին նախագահի 70 տարին լրանալը, իսկ գրասենյակը` ցմահ:

Ներկայացվող փոփոխությամբ`  առաջարկվում է օրենքից հանել մինչև «70 տարին լրանալ» բառերը, և վերը նշվածը տրամադրվում է ցմահ: Երկրորդ փոփոխությամբ` սահմանվում է պաշտոնաթող նախագահի կենսաթոշակի չափը` նախկին նախագահի կենսաթոշակը կկազմի գործող նախագահի աշխատավարձի 70 տոկոսը:

ԱԺ ՀՀԿ խմբակցության պատգամավոր Խոսրով Հարությունյանը կարծիք հայտնեց, որ այդ օրենքը կենսական հարց չի լուծում, սոցիալական հարց չի լուծում, ավելի շատ պարգևավճար է, ուստի մոտեցումը հասկանալի չէ` ինչո՞ւ է դիտվում որպես կենսական պայմաններ ապահովող խնդիր կամ կենսաթոշակ:

ԱԺ ՀՅԴ խմբակցության պատգամավոր Արծվիկ Մինասյանն էլ կարծիք հայտնեց, որ այն չպետք է կապել կենսաթոշակի հետ, որովհետև պաշտոնաթող նախագահի տարիքը կապ չունի, ուստի ի՞նչ իմաստ ունի թոշակ նշանակելը: Պատգամավորը հարցրեց նաեւ, թե կարո՞ղ է, արդյոք, անժամկետ հատկացվող գրասենյակն ու բնակարանը ժառանգվել:

«Դիտարկվո՞ւմ է, արդյոք, պաշտոնաթող նախագահներին նույն տարածքում բնակարան հատկացնելու հնարավորությունը, թող իրար հետ շախմատ խաղան, հանդիպեն, զրուցեն, սուրճ խմեն, գուցե նրանց միջև ագրեսիան նվազի»,- ասաց Արծվիկ Մինասյանը՝ կարծիք հայտնելով, թե գուցե կենսաթոշակի փոխարեն այլ անուն տրվի այդ վճարին:

Պատգամավորը նաև հարց ուղղեց հարակից զեկուցող` ԱԺ սոցիալական հարցերի մշտական հանձնաժողովի նախագահ Հակոբ Հակոբյանին, թե ինչպե՞ս են հարցում անելու ու պարզեն, թե պաշտոնաթող նախագահն ինչ պաշտոնի է նշանակվել: «Այդ ինչպե՞ս եք հարցում ուղարկելու Մոսկվա` հարցնեք, թե Ռոբերտ Քոչարյանը որևէ պաշտոն զբաղեցնո՞ւմ է, թե՞ ոչ: Արդյո՞ք դա չի նսեմացնում նախագահի ինստիտուտը: Մարդը զբաղեցրել է երկրի նախագահի պաշտոնը, հարգանքի է արժանի, ու դա պետք է հատկացվի, ոչ թե հարցում արվի»,- ասաց Արծվիկ Մինասյանը:

Հակոբ Հակոբյանը նշեց. «Ցավում եմ, որ չգիտեք` մենք արդեն երեք տարի է կենսաթոշակառուներից չենք հարցնում, թե` դրսում ինչ եք ստանում: Մենք վճարում ենք այն, ինչ հատկացվում է օրենքով: Չափը չեք կարողանո՞ւմ չափել»:

Արծվիկ Մինասյանը արձագանքեց. «Զարմանում եմ, որ,  լինելով հանձնաժողվի նախագահ, չգիտեք, որ օրենքով նախատեսված կարգով` կա սահմանափակում, ցավում եմ, որ չեք տիրապետում, առանց դիմումի նշանակում եք թոշակ, հետո պետք է ընկնեք, հարցում անեք: Չեք կարդացե՞լ նախագիծը, չեմ հասկանում, իսկ իմ չափը ես գիտեմ, ի տարբերություն շատ-շատերի»: