Մրգի արտահանումը նվազել է 4 անգամ

Ֆինանսների նախարարությունը հրապարակել է Հայաստանի 2014թ. արտահանման և ներմուծման ցուցանիշները: Պղնձի հանքաքարի և խտահանքի ծավալը, 2013-ի համեմատ, ավելացել է մոտավորապես 8 տոկոսով, սակայն գումարային արժեքով նկատվել է նվազում: Թեև արտահանման ծավալն ավելացել է, բայց գումարը նվազել է մոտավորապես 8 տոկոսով, ինչն, իհարկե, պայմանավորված է պղնձի գների նվազմամբ:

Yerkir.am-ը ավելի վաղ անդրադարձել էր նաև 2014-ի` խոշոր հարկ վճարողների ցանկին: Ըստ տվյալների` Զանգեզուրի պղնձամոլիբդենային կոմբինատը, 2013-ի համեմատ, 18 միլիարդ դրամ պակաս հարկ էր վճարել բյուջե:

Նվազել է նաև Հայաստանից արտահանվող էլեկտրաէներգիայի ծավալը: Եթե 2013-ին արտահանվել էր մոտավորապես 1.3 միլիոն կՎտ/ժ. էլեկտրաէներգիա, ապա 2014-ին արտահանվել է մոտավորապես 1.16 միլիոն կՎտ/ժ.:

Հետաքրքիր պատկեր է մրգերի արտահանման ոլորտում, այստեղ, կարելի է ասել, անկումն անսպասելի էր: 2013-ին Հայաստանը արտահանել էր 25000 տոննա ծիրան, բալ, կեռաս և դեղձ, իսկ 2014-ին այս մրգատեսակների արտահանման ծավալը նվսզել է մոտավորապես 4 անգամ` կազմելով 5800 տոննա: