Ոչ մի բուհի ռեկտոր, դասախոս կամ ուսանող չի կարող իրեն վեր դասել օրենքից. Աշոտյանը` պոլիտեխնիկի մասին

Այսօր լրագրողների հետ զրույցում ՀՀ ԿԳ նախարար Արմեն Աշոտյանը, խոսելով պոլիտեխնիկական ինստիտուտում ստեղծված իրավիճակի մասին, իր անձնական  մտահոգությունը հայտնեց, որ այդ բուհը կարճ ժամանակահատվածում հայտնվել է երրորդ կամ չորրորդ սկանդալային պատմության մեջ:

«Կարծում եմ` ղեկավարության պարտականությունն է ապահովել բուհի բարի համբավը և բարոյահոգեբանական առողջ մթնոլորտը, ինչպես նաև նորմալ ուսումնական պրոցեսի իրականացումը»,- ասաց նախարարը:

Նա նշեց, որ ԿԳ նախարարությունը ստացել է մի շարք բողոքներ, որոնց հետքերով իրականացվում են ուսումնասիրություններ: Աշոտյանն ընդգծեց, որ ԿԳ նախարարությունն առաջնորդվելու է բացառապես ՀՀ օրենսդրությամբ` հույս ունենալով, որ բուհում ստեղծված խնդիրները մոտ ապագայում կստանան իրենց վերջնական լուծումները:

«Ոչ մի բուհի ռեկտոր դասախոս կամ պրոֆեսոր չի կարող իրեն վեր դասել օրենքներից, ինչպես և ոչ մի ուսանող չի կարող իրեն վեր դասել օրենքներից: Ձեզ էլ, մեզ էլ, բոլորիս էլ հուզում է բուհի իմիջը: Այն, ինչ տեղի է ունենում բուհում, մտահոգիչ է` կառավարման որակի ու արդյունավետության տեսակետից, բարոյահոգեբանական մթնոլորտի տեսակետից»,- ասաց նախարարը` հավելելով, որ բուհում անցկացվելու են հանրային մոնիտորինգի գործողություններ: