Հայաստանում որևէ քաղաքացի` անկախ իր պաշտոնից, փողի քանակից, օրենքից վեր լինել չի կարող. Շարմազանով

Այսօր ՀՀԿ հերթական նիստից հետո ՀՀԿ խոսնակ Էդուարդ Շարմազանովին լրագրողները հարցրեցին Ճվճվ Արոյի որդիների քրեական վարքագծի մասին և դրա նկատմամբ  իրավապահների ու արդարադատություն իրականացնողների ընտրողական վերաբերմունքի մասին: Շարմազանովի խոսքով` ՀՀԿ նախագահ Սերժ Սարգսյանը և ՀՀԿ-ն մեկ անգամ չէ, որ խոսել են արդարադատության համակարգում տիրող խնդիրների մասին:

«Մեր կարծիքը չի փոխվել: Հայաստանում որևէ քաղաքացի անկախ իր ծագումից, պաշտոնից, փողի քանակից, օրենքից վեր լինել չի կարող: Բոլորը հավասար են օրենքի առաջ: Բայց կա՞ աշխարհում մի ոլորտ, որտեղ ամեն ինչ իդեալական է: Իմ կարծիքով` ոչ: Թերություններ կա այնտեղ, որտեղ արվում է աշխատանք: Ես էլ կարող եմ մատնանշել բազմաթիվ առավելություններ նույն ուժային ոլորտների վերաբերյալ»,- ասաց Շարմազանովը` հավելելով, որ չի ցանկանում գնահատական տալ պրոֆեսիոնալ իրավապահ մարմինների գործունեությանը: