Նախկին ռեկտոր Ուռուտյանն ու իր ձևավորած մերձավոր շրջապատը իրենց անգնահատելի բացասական ներդրումն ունեն. Ագրարայինի դասախոս

Հայաստանի ազգային ագրարային համալսարանի դասախոս Վրեժ Խոցանյանը, անդրադառնալով համալսարանի ներկա վիճակին, ֆեյսբուքում գրել է.

«Խիստ մտահոգ եմ ստեղծված իրավիճակով կապված Ագրարային համալսարանի հոգեվարքային գահավիժման ընթացքի վերաբերյալ։ Վերջին հինգ տարիներին ներքուստ և ի տես զգում էի, որ երբեմնի հզոր բուհը անճանաչելիորեն հետընթաց է ապրում, սակայն պարզվում է, որ այն պլանավորված ոչնչացման է գնում, այն էլ սեփական ղեկավարության միտումնավոր, հանցավոր, հեռանկարային քայլերի հերթականությամբ։

Փոխվեց ուսանողների ընդունելության կարգը, արդյունքում կտրուկ կրճատվեց ընդունելության թվաքանակը, չէր համալրվում մինչև անգամ պետպատվերը: Այնուհետև գրեթե դադարեց գյուղական երիտասարդության հոսքը համալսարան: Սկսվեց վհուկների որս. հմուտ, բազմափորձ դասախոսական անձնակազմն այլևս չկա։ Կարճ ասած տգիտությունը տրորում է գիտությանը։

Գյուղատնտեսական արտադրությունը սնանկացել է, ինչպես կադրային ռեզերվից, այնպես էլ գյուղ մթերքների արտադրության ոչ շահավետ զբաղմունքից։ Կադրերն են որոշում ամեն ինչ, ընդ որում ցավոք երկիրը կաղում է երկու ոտից։

Պարոն Նախկին ռեկտոր պարոն Վ․ ՈՒռուտյանը և իր ձևավորած մերձավոր շրջապատը իրենց անգնահատելի բացասական ներդրումն ունեն։ Խեղաթյուրեց ողջ ուսումնական գործընթացը, բարձրագույն կրթությունը վերածվեց ցածրագույնի, և այն Հ1-ով ներկայացնում է որպես ձեռքբերում: Ամոթ է։ Ուսումնական պրոցեսից դուրս մնացին ուսումնափորձնական տնտեսություններում պրակտիկ պարապմունքներն ու այլ այցերը, քայքայում, վերացնում են նաեւ ՈՒՓՏ-երը։ Մի խոսքով, Ագրարային համալսարանը խփում է SOS տագնապ: Օգնենք միասնաբար, անձերով և ազգովի, հանուն մեր հարազատ հայրենիքի բարգավաճմանը։

Հարցով մտահոգ մարդիկ, դո՛ւրս եկեք խորը թմբիրից»։