Մի ամբողջ ընտանիք «հնձեց», ու դեռ բողոքի ակցիա չլինե՞ր, հո մենք ոչխա՞ր չենք. Երվանդ Մանարյան

Մի ամբողջ ընտանիք «հնձեց», ու դեռ բողոքի ակցիա չլինե՞ր, հո մենք ոչխա՞ր չենք. Yerkir.am-ի հետ զրույցում, խոսելով Գյումրիում տեղի ունեցած սպանդի և դրան հաջորդած բողոքի ցույցերի մասին, ասաց ՀՀ արվեստի վաստակավոր գործիչ, բեմադրիչ, սցենարիստ Երվանդ Մանարյանը:

Ըստ նրա` հիմա անհրաժեշտ է դեպքի պատճառները գտնել, իսկ թե ի՞նչ հետևանք ունեցավ, դա հարցի երկրորդ կողմն է` կարևորը պատճառն է:

«Չեմ կարծում, թե Պերմյակովի մեկնաբանությունը` իբր մտել է ջուր խմելու, պետք է լուրջ ընդունենք: Նա հանցանք է գործել, ոճիր է գործել, պետք է դրա պատասխանը ստանա: Ասում են` հոգեկան շեղումներ է ունեցել: Շատ լավ, եթե նա տկարամիտ մարդ է` թող ըստ դրա դատեն, իսկ եթե գիտակցորեն է նման քայլի դիմել` ըստ այդմ էլ պետք է դատեն: Պետք չէ հեքիաթներ պատմել»,- ասաց Մանարյանը:

Նրա կարծիքով` մարդկայնորեն բարդ իրավիճակին գումարվում են նաև քաղաքական ենթատեքստերը, որոնք մենք չենք հասկանում:

«Մենք սովետի պայմաններում ապրած մարդիկ ենք, աշխարհից կտրված` չգիտենք էլ` միջազգային ինչ նորմեր կան: Բայց բողոքի ակցիաների իմաստն այն էր, որ մենք մնայինք միջազգային կարգուկանոնի մեջ, ոչ թե կուլ գնայինք սրա-նրա խաղին»,- ասաց Մանարյանը: