Ինչպե՞ս են ահաբեկիչները մտել շենք. պատմում են ականատեսները

Գրասենյակային շենքի աշխատողների վկայությամբ, որտեղ տեղակայված է Charlie Hebdo խնմագրությունը, հրաձգությունը տևել է 15 րոպե:

Երկու սպանված ոստիկաններից մեկը եղել է մոտ 30 տարեկան: Նա  ոստիկանության շարքային աշխատակից էր: Երկրորդ սպանվածը Ֆրանսիայի դաշնային պաշտպանության ծառայության աշխատակից էր, նրա պարտականությունների մեջ էր մտնում բարձրաստիճան պաշտոնյաների անվտանգության ապահովումը:  

Le nouvel Observateur-ի լրագրողը մեջբերում է ականատեսներից մեկի խոսքը, ով առաջինն է նկատել ահաբեկիչների մուտքը խմբագրություն. «Ես սուրճ էի եփում, երբ սկսվեցին կրակոցները:Տեսա երկու զինված մարդկանց: Նրանք կրակեցին ոստիկանի վրա: Նա ընկավ: Ամեն ինչ տեղի ունեցավ երկու րոպեում: Հանցագործները թաքնվեցին: Ես վազեցի դեպի ոստիկանը և բռնեցի ձեռքը: Մոտ 20 րոպե ոչինչ տեղի չէր ունենում, ոչ մի օգնություն: Նրան հնարավոր էր փրկել»:

 Նկարչուհի Կոկոն, ով "Charlie Hebdo"-ի հետ համագործակցում էր, l'Humanite-ին պատմել է.

 «Երբ ես, աղջկաս հետ մոտեցանք խմբագրության մուտքին, մեր վրա հարձակվեցին երկու զինված  տղամարդիկ   : Նրանք սկսեցին մեզ ահաբեկել և պարտադրեցին մեզ հավաքել մուտքի դռան կոդը: Նրանք  կրակում էին ծաղրանկարիչների վրա: Դա շարունակվեց հինգ րոպե: Ինձ հաջողվեց փածչել իմ աշխատասենյակ…: Նրանք հիանալի խոսում էին ֆրանսերեն և ասացին որ ներկայացնում են Ալ Քաիդա կազմակերպությունը»: