Ամենաբարձրահասակն էի դպրոցում, ինձ բեղ-մորուք դրեցին, ու դարձա Ձմեռ պապ

Yerkir.am-ի հումորային բլից հարցերին պատասխանում է Սփյուռքի նախարար Հրանուշ Հակոբյանը:

-Ամանորին, Ամանորի գիշերը շա՞տ խմեցիք:

-Ես ընդhանրապես ալկոհոլ չեմ օգտագործում: Խմում եմ հյութ կամ լիմոնադ:

-Ամենաուրախ, ամենահիշվող Նոր տարին:

-Ամենաուրախ ու հիշվող Նոր տարին այն ժամանակ էր, երբ ես Ձմեռ պապիկ էի դարձել:

-Իսկ ամենատխուրը:

-2012-ն էր շատ տխուր, հայրս մեզ հետ չէր:

-Ամենաթանկ ամանորյա նվերը (գումարի առումով), որ ստացել եք:

-Այդպիսի սովորություն չունենք նվերների գները նայել: Մենք ավելի շատ փոքրիկներին ենք նվերներ անում, մեծերով իրար շնորհավորում ենք, կոնֆետ ու խմիչք ենք փոխանցում:

-Ամենաօրիգինալ նվերը:

-Երեխաների ձեռքի աշխատանքները:

-Տոնը ստացված է, երբ...

-Երբ բոլորս ուրախ ենք, բոլորս կողք կողքի ենք, միասին:

-Առանց ինչի՞ չեք պատկերացնում Ամանորի սեղանը:

- Առանց Քյավառի քյուֆթայի ու փախլավայի:

-Ձեր հանդիպած ամենատպավորիչ Ձմեռ պապը:

-Հրապարակում Ձմեռ պապիները, որ իրար հետևից վազվզում են, մի կողմից ուրախանում եմ, մյուս կողմից` տխրում, որովհետև երեխաների համար հեքիաթն այն է, որ Ձմեռ պապը մեկ հատ է լինում, ոչ թե բազմաթիվ Ձմեռ պապիկներ: Դա վրաս ազդում է:

-Ձմեռ պապն առանց Ձյունանուշի, ինչպես …

- Ինչպես մայրն առանց երեխայի, ընտանիքն առանց կնոջ:

-Ձմեռ պապ լինելու բախտին ե՞րբ եք արժանացել:

- Ձմեռ պապ եմ եղել դպրոցական տարիներին: Ամենաբարձրահասակն էի դպրոցում, սիրում էի ասմունքել, ինձ բեղ-մորուք դրեցին, ու դարձա Ձմեռ պապիկ: Ասմունքել եմ` «Բեղեր ունեմ` ամպի քուլա, մորուք ունեմ` ամպի լուլա, երբ որ փչեմ` ձյուն կգա...»:

-Ամանորյա գնումներից հետո, մինչեւ հաջորդ աշխատավարձը, գրպանում գումար մնա՞ց:

- Երևի, ես էդպես ճոխ բաներ չգնեցի:

-Հետևեցի՞ք, թե ով որքան կերավ Ձեր՝ Նոր տարվա սեղանից :

- Իհարկե` ոչ, շատ եմ սիրում, երբ մարդիկ օգտվում են սեղանից, հակառակ դեպքում` ո՞ւմ է պետք պատրաստել այդքան, որ հետո մնա, փչանա:

-Ամանորի սեղան գցելու գործում Ձեր բաժինը:

-Մեր փոքրիկ ընտանիքը բաղկացած է 34 մարդուց, հավաքվում ենք քույրիկներով ու պատրաստում ուտեստները: Բոլորը նախ գալիս են մայրիկիս շնորհավորելու : Տոլմա փաթաթելն ու պասուց տոլման և քյուֆթան պատրաստում եմ մեկ-երկու օր առաջ:

-Եղա՞ն մարդիկ, որ մտքում հաշվեցին Ձեր ամանորյա սեղանի արժեքը:

- Ոչ, մեր սեղանը սովորական սեղան է, միայն տարբերվում է նրանով , որ ավելի գեղեցիկ է ստացվում:

-Միջինը քանի՞ բոնբոներկա եք նվիրում հյուր գնալիս:

- Ես այդքան էլ շատ չեմ հյուր գնում:

-Ինչպե՞ս կարելի է ապրել մարդավարի, եթե յուրաքանչյուր տարի որևէ կենդանու տարի է:

- /Ծիծաղում է/ Լավն էր հարցը, դե դրան էլ հումորով պետք է նայել, կենդանիների տարի են հռչակում, որ այդ կենդանիներին էլ հիշենք, կամ այդ կենդանու մորթու գույնի հագուստ կրենք:

-Ոչխարից (այս տարի այդ կենդանակերպի տարին է) ի՞նչ ակնկալիքներ ունեք:

-Որ ոչխար չդառնանք: