Բիթլիսի փոխնահանգապետն ընդունել է, որ ատելություն է տածում հայկական ժառանգության նկատմամբ

Արդեն տեղեկացրել ենք, որ Լոնդոնի «Կոմիտաս» ինստիտուտի տնօրեն Արա Սարաֆյանը բաց նամակ էր հղել Բիթլիսի նահանգապետ Օրհան Օզթուրքին` կոչ անելով Բիթլիսի փողոցներից մեկը կոչել գրող Վիլյամ Սարոյանի անունով: Սակայն նահանագապետը հրաժարվել էր փողոցին Սարոյանի անունը տալ՝ պնդելով, որ «Սարոյանը Բիթլիսի հետ որևէ կապ չունի»:

Այնուհետև Բիթլիսի նահանգապետարանի մեջլիսում քվեարկության էր դրվել փողոցն անվանափոխելու մասին առաջարկը, սակայն, հավաքելով քիչ ձայն, առաջարկը մերժվել էր:

«Ակօս»-ը հաղորդում է, որ, համաձայն Բիթլիսից ստացված տեղեկությունների, փողոցին Սարոյանի անուն տալու մասին առաջարկը մերժելը պետության՝ հայերի ժառանգության նկատմամբ «ռեֆլեքսի» մի նոր օրինակ է: Դա պարզ երևում է Բիթլիսի փոխնահանգապետ Սալիհ Ալթունի` հայկական Սբ Աղբերիկ վանքի վերանորոգման մասին արած հայտարարություններում:

«Իմ չսիրած մարդու կառուցած շենքը իմ չսիրած շենքն է: Ինչո՞ւ այն պաշտպանեմ»,- ասել է Բիթլիսի փոխնահանգապետը՝ հայկական վանքի վերանորոգման աշխատանքներին անդրադառնալով: