Բիթլիսի փոխնահանգապետը դատի է տվել «Ակօս»-ին հայերի հանդեպ իր տածած ատելության մասին գրելու համար

Արդեն տեղեկացրել ենք, որ «Ակօս» թերթը լուր էր հրապարակել այն մասին, թե Բիթլիսի փոխնահանգապետ Սալիհ Ալթունն ընդունել է, որ ատելություն է տածում հայկական ժառանգության նկատմամբ: Նա ասել էր. «Իմ չսիրած մարդու կառուցած շինությունն իմ չսիրած շինությունն է: Ինչո՞ւ պաշտպանեմ այն»:

Ըստ Haberler-ի` Բիթլիսի փոխնահանգապետ Ալթունը հերքել է «Ակօս»-ի հրապարակած լուրը` պնդելով, որ «իր խոսքերն աղավաղել են, և այդ հարցով դատական գործընթաց է սկսել»:

Թուրքական լրատվամիջոցը պնդում է, որ «Ակօս» պարբերականը «Փոխնահանգապետն ընդունել է հայերի հանդեպ տածած ատելությունը» վերնագրված հոդվածը` փոխնահանգապետի լուսանկարով, մի քանի անգամ տարածել է Twitter-յան էջում, և այն, ունենալով մեծ քանակությամբ դիտում, կամա, թե ակամա փոխնահանգապետին թիրախ է դարձրել: