Ծառուկյանը ելույթ չունեցավ, բայց ասաց, որ պատրաստ է

Ազատության հրապարակում ոչ իշխանական 3 ուժերի հանրահավաքում, երբ ելույթ էր ունենում «Ժառանգություն» կուսակցության նախագահ Րաֆֆի Հովհաննիսյանը, ժողովուրդը վանկարկում էր` «հի-մա, հի-մա»: Ուստի Հովհաննիսյանը, ընդհատելով ելույթը, հայտարարեց, որ հետագա քայլերը որոշելու համար կմոտենա Ծառուկյանին եւ Տեր-Պետրոսյանին: Ուշագրավ է, որ վերջիններս բեմի տարբեր հատվածներում էին կանգնած, եւ, ընդհանուր հայտարարի չգալով, ամբիոնին մոտեցավ Գագիկ Ծառուկյանը:

Նա նախ հայտարարեց, որ շատ հպարտ է, որ կանգնած է ժողովրդի կողքին: Նաև ասաց, որ հատուկ ելույթ չի ունենալու, լսելու է մյուսներին, իսկ իր ելույթը կլինի հաջորդ հանրահավաքում: Բայցեւ հայտարարեց, որ ժողովուրդը մեծ հաջողություն է ունենալու, եւ որ այդ հաջողության սկիզբը դրվելու է այստեղ: «Պատրա՞ստ եք այդ պայքարին: Ես հայտարարում եմ, որ պատրաստ եմ»,- ասաց նա եւ հեռացավ` առանց բացատրելու, թե ինչու ելույթ չի ունենալու: