Քաղաքական գործչի ճակատագիրն ու արդարադատության նախարարի «ընտրությունը»

Արդարադատության նախարար Հովհաննես Մանուկյանի կարծիքով` քննադատությունների առումով նախարարությունն իսկապես խոցելի է, համակարգում էլ խնդիրները շատ են:

«Դրանք բավական նուրբ խնդիրներ են, որոնք առնչվում են սոցիալական բազմաթիվ շերտերի ու բազմաթիվ քաղաքացիների: Վերցնենք նույն քրեակատարողական համակարգը կամ հարկադիր կատարման ծառայությունը: Վերջին 4-5 ամիսներին թերևս ամենալուրջ քննարկվող թեմաների կենտրոնում այս երկու համակարգերը հաստատ կան: Դրան գումարենք նոտարական համակարգը, ԶԱԳՍ-երը, թեև վերջինիս վրա նախարարությունն ունի ընդամենը մեթոդոլոգիական ազդեցություն, բայց դրանք այն ոլորտներն են, որոնք առնչվում են քաղաքացիների խնդիրներին: Բնականաբար, դժգոհություններ անընդհատ կան, և դժգոհության սլաքները միանգամից ուղղվում են նախարարությանը կամ նախարարին: Ի՞նչ ասեմ, քաղաքական գործչի ճակատագիր է»,- լրագրողների հետ զրույցում ասաց նախարարը:

Հարցին, թե ինչպե՞ս է վերաբերվում Սուրիկ Խաչատրյանին մարզպետ նշանակելու` կառավարության որոշմանը, մանավանդ, որ նշանակման օրն այդպես էլ չցանկացավ պատասխանել այդ հարցին, Հովհաննես Մանուկյանը պատասխանեց. «Ես` որպես իրավաբան, պետք է պատասխանեմ, որ կա կառավարության որոշում, կառավարությունը նման որոշում է կայացրել»:

Լրագրողները համառեցին` որպես արդարադատության նախարար` ինչպե՞ս է վերաբերվում: Հովհաննես Մանուկյանը պատասխանեց. «Որպես արդարադատության նախարար, որպես գյուղատնտեսության նախարար... Բոլորս կառավարության անդամներ ենք, յուրաքանչյուրս ունենք ձայն: Երբ կառավարությունը որոշում է ընդունում, էական չէ` ով ինչ ոլորտի նախարար է, նրանք բոլորը մեկ ձայնի իրավունք ունեն կառավարության նիստի ժամանակ, և բոլորը միաձայն քվեարկել են, այդ թվում` նաև ես»: