Եգիպտոսը դատապարտել է Էրդողանի ելույթն ու չեղյալ հայտարարել երկկողմ հանդիպումները

ՄԱԿ-ի Գլխավոր ասամբլեայի 69-րդ նստաշրջանում Թուրքիայի նախագահ Ռեջեփ Թայիփ Էրդողանի ելույթը դժգոհություն է առաջացրել Եգիպտոսի պատվիրակության մոտ:

Ըստ Haberler-ի՝ ելույթում Էրդողանը միջազգային հանրությանը մեղադրել է Եգիպտոսում ռազմական հեղաշրջում իրականացնողներին օրինականացնելու մեջ:

«Եգիպտոսում տապալում են ժողովրդի կամքով ընտրված նախագահին, իսկ ՄԱԿ-ն ու եվրոպական երկրները ընդամենը բավարարվում են` դա դիտելով: Եթե ասում ենք «ժողովրդավարություն», ապա ինչո՞ւ չենք հարգում քվեարկության արդյունքները: Եթե մենք ցանկանում ենք աջակցել հեղաշրջումներին, ապա ինձ համար հետաքրքիր է՝ ո՞րն է Միացյալ ազգերի կազմակերպության գործը»,- ասել է Էրդողանը:

Եգիպտացի պաշտոնյաներն իրենց վրդովմունքն են արտահայտել Էրդողանի ելույթի վերաբերյալ: Եգիպտոսի ԱԳՆ պաշտոնական ներկայացուցիչ Բադր Աբդել Աթին ասել է, որ նրա արտահայտությունները «զրպարտություններ են»:

«Թուրքիայի նախագահի ելույթում զարմանալի բան չկա: Մանավանդ, եթե հաշվի առնենք այն, որ նա  ձգտում է քաոս սերմանել Մերձավոր Արևելքում՝ աջակցելով ահաբեկչական խմբավորումներին և վերջիններիս ապաստան տրամադրելով, փորձում է ոտնահարել տարածաշրջանի ժողովուրդների շահերը՝ հանուն անձնական հավակնությունների և անցյալի պատրանքների»,- ասել է նա: