«Պարիր, թե կարող ես»-ի մասնակիցը փորձել է շոու բիզնեսի ներկայացուցիչներին աղանդի մե՞ջ ներգրավել

Հայաստանում հայտնվել է նոր աղանդ` «Նոր ուղի» է կոչվում, որի ներկայացուցիչները մարդկանց դրդում են ինքնասպանության: Այս մասին լրագրողների հետ հանդիպման ժամանակ հայտնեց Միացյալ երիտասարդական լիգայի նախագահ Սևակ Հովհաննիսյանը:

Նա նշեց նաև, թե աղանդի պարագլուխներից մեկն էլ «Պարիր, թե կարող ես» նախագծի մասնակից Մարի Հովհաննիսյանն է, ով փորձում է շոու բիզնեսի ներկայացուցիչներին ներգրավել աղանդի մեջ:

«Աղանդը Հայաստան է ներթափանցել Ուկրաինայից: Այժմ մոտ 40 հոգի հաճախում է այս աղանդը: Ինձ արդեն դիմել են շոու բիզնեսի ներկայացուցիչներ, որոնց հարազատները փորձել են ինքնասպանություն գործել: Աղանդը քարոզում է ինքնասպանության փորձի միջոցով կամ ինքնասպանությամբ նոր ուղի գտնելը»,- ասաց Հովհաննիսյանը` հավելելով, որ համապատասխան փաստաթղթեր ձեռք բերելուց հետո նոր միայն կդիմի համապատասխան մարմիններին: Ապա` այդ աղանդավորականներից մեկի մասին օրինակ բերեց. «Օրինակ նրանցից մեկն իմ առջև գլուխը հեռուստացույցի էկրանին էր խփել` այսպիսով փորձելով նոր ուղի գտնել»: