Երբեմն եկեք ներենք նրանց. Արտեմ Հարությունյանը` նախագահի` կոչումներ ու շքանշաններ տալու մասին

«Կարծում եմ` կարելի էր ավելի լավ ընտրություն կատարել, քանի որ դուրս մնացին մարդիկ, ովքեր ամբողջ կյանքը նվիրել են իրենց արվեստին, արվեստին` բառի բուն իմաստով»,- Yerkir.am-ի հետ զրույցում կարծիք հայտնեց բանաստեղծ Արտեմ Հարությունյանը` անդրադառնալով նախօրեին` Անկախության տոնին նվիրված, ՀՀ նախագահի` մի շարք մարդկանց կոչումներով ու շքանշաններով պարգևատրելուն:

Բանաստեղծը նշեց, թե հասկանալի է, որ հնարավոր չէ բոլորին պարգևատրել, բայց քանի որ ազգային հենքի վրա է պարգևատրումն իրականացվում, ուստի պետք է ավելի լավ ընտրություն կատարել:

«Լավ է, որ ազգային դեմքերին փորձում են ոգեշնչել, հույս տալ, բայց պետք է ավելի զուսպ ընտրություն արվի, պետք է չափանիշներ լինեն, քանի որ ազգային ֆոնը հարատևող արժեք է ուզում, իսկ էստրադային երգիչները, մեկ էլ տեսնում ես, մի քանի տարի հետո հանկարծ կորչում են, պարզվում է` նրանք սպառվեցին, կորցրին իրենց մեղեդայնությունը: Էհ, ինչ անենք` ոչինչ, երբեմն եկեք ներենք նրանց»,- ասաց Հարությունյանը: