Դեյր Զորի հայկական եկեղեցին պայթեցրած ահաբեկիչները բուժվում են Թուրքիայի հիվանդանոցում

Շրջանառվող վարկածի համաձայն՝ «Իրաքի և Լևանտի իսլամական պետություն» ահաբեկչական խմբավորման վիրավոր անդամները բուժվում են Թուրքիայի Շանլըուրֆա քաղաքում: Այս մասին հայտնում է T24-ը՝ վկայակոչելով Hurriyet-ը:

Ըստ թերթի՝ 28-ամյա Ամմար Ալոն, ով կասկածվում է ահաբեկչական խմբավորման անդամ լինելու մեջ, առավոտյան բերվել է Շանլըուրֆայի «Մեհմեդ Աքիֆ Ինան» կրթության և հետազոտության հիվանդանոց: Նախքան այս հիվանդանոց բերվելը՝ նա եղել է Աքչաքալե պետական հիվանդանոցում:

Հիվանդանոցի աշխատակիցներից մեկը, ով չի ցանկացել ներկայանալ, տեղեկություններ է հաղորդել հիվանդի մասին, թե նա գտնվում է ծանր վիճակում և նրա հիվանդասենյակը հսկվում է 3-4 ոստիկանի կողմից: Նույն անձը հայտնել է նաև, որ անցած ուրբաթ ահաբեկչական խմբավորման 5 անդամ է  ձերբակալվել թուրքական սահմանին և բերվել հիվանդանոց՝ նրանց նկատմամբ դատաբժշկական փորձաքննություն կատարելու համար:

Կայքը փորձել է կապ հաստատել հիվանդանոցի հետ, սակայն հիվանդանոցի աշխատակիցները hետադարձ կապ չեն հաստատել:

Հիշեցնենք, որ երեկ սույն ահաբեկչական խմբավորման անդամները պայթեցրել էին Դեյր էլ Զորի Սրբոց Նահատակաց եկեղեցին: