Ինչո՞ւ թուրքական մամուլը չի անդրադարձել Դեյր Զորի եկեղեցու պայթեցմանը

Թուրքական մամուլը չի անդրադարձել այն փաստին, որ «Իրաքի եւ Լեւանտի իսլամական պետության» (ISIS) գրոհայինները պայթեցրել են Դեյր էլ Զորի Սրբոց Նահատակաց հայկական եկեղեցին: «Սա խորամանկ քայլ է նրանց կողմից»,- լրագրողների հետ հանդիպման ժամանակ ասաց թուրքագետ Անդրանիկ Իսպիրյանը:

Ըստ նրա` լուրին անդրադարձել է միայն հայկական «Ակօս»-ը և մեկ քրդական կայք` «Ակօս»-ին հղում տալով: Սա, թուրքագետի կարծիքով, հետևյալ տրամաբանությանն է տանում` եթե արձագանք չկա մամուլում, բնականաբար, նաև Թուրքիայի իշխանությունը չի պատասխանի երևույթին:

«Միայն ուղիղ հարցին նրանք ստիպված կլինեն պատասխանել, իսկ պատասխանից էլ մեծ ակնկալիք պետք չի ունենալ: Ասելու են` մենք դատապարտում ենք նման գործողությւոնները` սրբավայրերի պայթեցումը` անկախ կրոնական պատկանելությունից, չի խրախուսվում, և որպես օրինակ` Աղթամարում վերանորոգված հայկական եկեղեցին են նշելու»,- ասաց Իսպիրյանը` հավելելով, թե այն, որ Թուրքիան համագործակցում է ISIS-ի հետ, փաստ է:

Արաբագետ Արմեն Պետրոսյանն էլ նշեց, որ իրականում, պայթեցնելով հայկական եկեղեցին, մուսուլման ահաբեկիչները ցանկանում էին ուշադրության կենտրոնում հայտնվել. «Նրանք ուզում են միջազգային հանրության ուշադրության կենտրոնում հայտնվել և կուռք դառնալ երիտասարդ մուսուլմանների համար»: