Վարորդների դժգոհությունները, երթևեկության խախտման տուգանքների իրազեկման հետ կապված, հաշվի կառնվեն

Վարչական իրավախախտումների մասին ՀՀ օրենսգրքում փոփոխություններ կատարելու մասին օրինագիծը մշակվել է կառավարության հետ համատեղ` 24-ժամյա ռեժիմի կիրառմամբ:

Հիմնական զեկուցող` ԱԺ ՀՀԿ խմբակցության պատգամավոր Արփինե Հովհաննիսյանը նշեց, որ խոսքը վերաբերում է ճանապարհային երթևեկության օրինախախտումների վերաբերյալ կարգի փոփոխմանը, այն է՝ եթե անձը, որին ուղարկվել է ճանապարհային երթևեկության խախտման մասին որոշումը, չի եղել տրանսպորտային գրանցման հաշվառման կամ վկայական ստանալու կամ վարչական իրավախախտման վերաբերյալ արձանագրություն կազմելու ժամանակ իր գրանցման վայրում կամ ճիշտ չի նշել հասցեն կամ հրաժարվել է ստանալ գրավոր որոշումը, ինչպես է կարգավորվելու նրա հարցը:

Պատգամավորը նշեց, որ երկու ամիս առաջ հասարակության շրջանում մեծ աղմուկ էր բարձրացել` կապված դատական ակտերի հարկադիր կատարման գործընթացում քաղաքացիների հաշիվների ամբողջական արգելափակման հետ: Եվ շատ հաճախ քաղաքացիները պարզապես տեղյակ չէին լինում այն տուգանքների մասին, որոնք կայացվել են իրենց նկատմամբ, այդ տուգանքները կրկնապատկվում, հնգապատկվում էին, և դատական ակտերի հարկադիր կատարման ծառայությունը արգելափակում էր այդ քաղաքացիների հաշիվները:

Արփինե Հովհաննիսյանը նշեց, որ քաղաքացիներին տուգանքների մասին իրազեկելու այն միջոցները, որոնք կան օրենսգրքում, չեն համապատասխանում քաղաքացիների շահերի իրական ապահովման սկզբունքին: Խնդիրները շատ են, մասնավորապես` ո՞ր դեպքերում է քաղաքացին համարվում իրազեկված:

Փոփոխությունների արդյունքում նախատեսվում է, որ քաղաքացին համարվում է իրազեկված, եթե անձամբ նրան է փոխանցվում տուգանքի մասին որոշումը, երբ քաղաքացին անձամբ ստորագրում է ծանուցման անդորրագիրը կամ ստորագրում է, որ հրաժարվում է ստորագրել անդորրագիրը: Իրազեկման երկրորդ փուլում կրկին ուղարկվում է որոշումը քաղաքացու հաշվառման հասցեով ` տեղադրելով դա էլեկտրոնային կայքում:

Նախատեսվում է քաղաքացուն հնարավորություն տալ ընտրելու իրազեկման այն ձևը, որը նա նախընտրում է՝ բջջային հաղորդագրություն, էլեկտրոնային փոստ, հաշվառման հասցեով և այլն: