Տաքսու վարորդների տույժ-տուգանքների մի մասը կարող է համաներվել

ՀՀ ԱԺ տնտեսական հարցերի մշտական հանձնաժողովը նիստում քննարկվում էր մի շարք վարչական իրավախախտումների և պետական  տուրքի համար կիրառված տույժերի օրենքի նախագիծը, որով առաջարկվում է համաներում կիրառել:

Նախագծի հեղինակը կառավարությունն է, խորհրդարանականներին ներկայացնողը`բարձր տեխնոլոգիական արդյունաբերության նախարար Հակոբ Արշակյանը:

«Համաներման մասին օրենքի նախագիծը 3 մասից է բաղկացած: Դրանցից մեկը վերաբերում է թույլատրելի զանգվածը գերազանցած ՏՄ-ների, 2-րդը՝  առանց համապատասխան լիցենզիաների ուղևորափոխադրումներ իրականացրած տաքսու վարորդների, և 3-րդը՝ տաքսիների կողմից վճարվող պետական տուրքին: Տնտեսվարող սուբյեկտը տուրքը վճարելու դեպքում տույժ-տուգանքներից ազատվում, նրան տրվում էր 3 ամիս, որ այդ տուրքը վճարի, այս մասը երկարացվել է մինչև 6 ամիս: Օրենքն ընդունելուց հետո  տաքսու այն վարորդները, որոնք պետտուրքը չեն վճարել և դրա համար տույժ-տուգանքների են ենթարկվել, կարող են տուրքը վճարել 6 ամսում և ազատվել տուգանքներից»,– պարզաբանեց նախարարն ու ավելացրեց` մնացած դեպքերում կիրառված տուգանքները համաներվում են:

Օրինագիծը դրական եզրակացություն ստացավ հանձնաժողովի կողմից: