Իրաքում առևանգված եզդի կանանց վաճառում են 50-100 դոլարով

Իրաքում դեռ շարունակվում են եզդիական համայնքի վրա հարձակումները: Yerkir.am-ի հետ զրույցում «Սինջար եզդիների ազգային միավորում» ՀԿ-ի նախագահ Բորիս Մուրազին նշեց, որ այս օրերին մուսուլմանները եզդիական 10-ից ավելի սրբավայրեր են պայթեցրել, 1 սրբավայր էլ հիմա են փորձում պայթեցնել:

«Ուրախալի է, որ վերջին շրջանում լեռներին մոտ գտնվող 4 գյուղ է ազատագրվել, ինչը հնարավորություն է տվել մի քանի հազար մարդկանց իջնել` իրենց գյուղերում բնակվել: Սակայն կան մարդիկ, ովքերք այդպես էլ չեն իջնում լեռներից, քանի որ վստահ չեն` ինչ կլինի: Պետք է մուսուլմաններին մաքրել այդ գյուղերից»,- ասաց Մուրազին:

Նա տեղեկացրեց նաև, որ այս ընթացքում 3000 կին է առևանգվել: Ի դեպ, մուսուլմանները առևանգված կանանց ոչ միայն բռնաբարում են, այլև վաճառում:

«Մի քանի հարյուր կին արդեն վաճառվել է, անգամ գին կա սահմանված` 50-150 դոլար` կանանց տարիքից կախված: Կանանց տանում են Մոսուլ, որն իսլամիստների ենթակայության տակ է, այնտեղ կանանց բանտերում կամ հյուրանոցներում են պահում` վաճառելու համար»,- ասաց Մուրազին: