ԻՊ-ը եզդի կանանց է վաճառում Այնթապի շուկայում. Թուրքիայի իշխանությունները լռում են

Թուրքիայի Այնթապ (Գազիանթեփ) քաղաքում «Իսլամական պետություն» ահաբեկչական խմբավորմանը պատկանող ստրուկների շուկայի հետ կապված հերթական դատական հայցն է ներկայացվել. տեղեկացնում է Ermenihaber-ը:

Թուրքական siyasihaber1.org լրատվակայքի համաձայն՝ Թուրքիայի Ազգային մեծ ժողովի պատգամավոր, ընդդիմադիր քրդամետ Ժողովուրդների դեմոկրատական կուսակցության ներկայացուցիչ, ազգությամբ եզդի Ֆելեքնազ Ուջան հարցում էր ներկայացրել խորհրդարան, որին պետք է պատասխաներ Թուրքիայի ներքին գործերի նախարարությունը: Սակայն պատասխանատու պաշտոնյաներից  որևէ մեկը մինչ օրս թեմային չի արձանգանքել:

Բացի այս` Թուրքիայում գործող երեք իրավապաշտպան կազմակերպություններ՝ «Առաջադիմական կանանց միությունը», Անթեփի իրավաբանների պալատը և «Բռնությամբ պահվող կանանց համար պայքարի հարթակը» տարբեր ժամանակներում խնդրի առթիվ 3 դատական գործ են հարուցել:

«Բռնությամբ պահվող կանանց համար պայքարի հարթակը» քրեական գործ է հարուցել «մարդկանց առևտրի», «ազատության սահմանափակման», «ցեղասպանության», «գաղթականների անօրինական տեղափոխման» և «մարդկության հանդեպ հանցանք գործելու» մեղադրանքներով՝ հղում անելով Թուրքիայի քրեական օրենսգրքին ու «Անդրազգային կազմակերպված հանցագործությունների դեմ» ՄԱԿ-ի կոնվենցիային, մասնավորապես՝ դրան կից «Անձանց, հատկապես կանանց և երեխաների թրաֆիքինգը կանխարգելելու, զսպելու և պատժելու մասին» արձանագրությանը:

Կազմակերպությունը պահանջել է քրեական գործ հարուցել նաև այն թուրք պաշտոնյաների հանդեպ, ովքեր ավելի վաղ այս խնդրով հարուցված գործերին ընթացք չեն տվել կամ չեն զբաղվել խնդրի բացահայտման և կանխարգելման հարցերով, մինչև այն կհայտնվեր լրատվամիջոցների և հանրության ուշադրության կենտրոնում: