Հասկացեք՝ Հայաստանը մեր դաշնակիցն է, Ադրբեջանը՝ հարևանն ու բարեկամը. Ալեքսեյ Պուշկով

Բաքվում շարունակվում է ԵԱՀԿ Խորհրդարանական վեհաժողովի ամառային նստաշրջանը: Բաքվում գտնվող` ՌԴ Պետդումայի միջազգային հարցերով կոմիտեի նախագահ Ալեքսեյ Պուշկովը հարցազրույց է տվել ադրբեջանական haqqin.az-ին, որում անդրադարձել է ԼՂ հակամարտությանը, Հայաստանի և Ադրբեջանի հետ ՌԴ-ի հարաբերություններին, ինչպես նաև Ադրբեջանին Եվրասիական միություն հրավիրելու հնարավորությանը:

Նա նշել է, որ ցանկացած երկիր ինքը պետք է որոշի ՝ անդամակցե՞լ որևէ կառույցի, թե՞ ոչ: Սխալ է որևէ երկրի ինչ-որ կարծիք պարտադրելը, Ադրբեջանի դեպքում,  կարծես, այդպես է դուրս գալիս:

«Երևում է՝ Ադրբեջանը կարծում է, որ ժամանակը չէ անդամակցել ԵՏՄ-ին: Մենք պետք է հարգանքով վերաբերվենք այդ որոշմանը»,- ասել է Պուշկովը:

Անդրադառնալով հարցին, թե ԼՂ հակամարտությունը խանգարող հանգամանք է ռուս-ադրբեջանական հարաբերություններում, և Ադրբեջանում շատերը կարծում են, որ եթե ՌԴ-ն ցանկանա, այդ հարցը վերջապես կլուծվի, նա նշել է. «Ամեն ինչ այդքան հեշտ չէ, որքան թվում է: ԼՂ հակամարտությունը շատ բարդ հակամարտություն է, ես կասեի՝ բարդագույնը հետսովետական տարածությունում: Ռուսաստանը կարող է միայն օգնել կողմերին փոխընդունելի որոշումներ կայացնել: Հասկացեք՝ Հայաստանը մեր դաշնակիցն է, Ադրբեջանը՝ հարևանը և բարեկամը, ուստի Ռուսաստանը չի կարող աջակցել կողմերից որևէ մեկին»: