ՀՀԿ-ական պատգամավորը դժգոհեց` Գառնու տաճար նախարարի միջամտությունից հետո են թույլ տվել մտնել

Այսօր ԱԺ արտահերթ նիստում ԱԺ ՀՀԿ խմբակցության պատգամավոր Սամվել Ֆարմանյանը ելույթ ունեցավ` անդրադառնալով վերջին օրերին հանրության զայրույթն առաջացրած` պատմամշակութային հուշարձանների մոտակայքում խնջույքներ կազմակերպելու խնդրին:

Նա նշեց, որ զբոսաշրջիկների հետ այցելել է Գառնու տաճար, սակայն իրենց թույլ չեն տվել մտել այնտեղ` ասելով, որ մի մասնավոր կազմակերպություն վարձակալել է այդ տարածքը խնջույքի համար, և որ այդտեղ է լինելու նաև պաշտոնական պատվիրակություն արտերկրից:

«Բնականաբար, ճշտեցինք, որ ոչ մի պաշտոնական պատվիրակություն էլ չի գալու այդտեղ, իսկ դրսում կանգնած սպասում էին բազմաթիվ զբոսաշրջիկներ: Կապվեցինք մշակույթի նախարար Հասմիկ Պողոսյանի հետ, և միայն նրա միջամտությունից հետո թողեցին մտնել Գառնու տաճարի տարածք»,- ասաց պատգամավորը:

Նա նշեց, որ այդ հարցը շատ կարևոր է համարում, և խնդրեց ԱԺ նախագահին, որպեսզի նա դիմի համապատասխան մարմիններին` զբաղվել այդ հարցով: Ըստ պատգամավորի` եթե պետական միջոցներն այնքան սուղ են, որ պատմամշակութային արժեքների պահպանության հարց է առաջանում, դա դեռ չի նշանակում, որ դրանք պետք է վարձով տալ մասնավոր մարդկանց, որ նրանք էլ փակեն տարածքը: