Կառավարությունը 12 կետերը մինչև սեպտեմբերի վերջը կարող է իրականացնել. Ռուբեն Հակոբյան

Այսօր ԱԺ ճեպազրույցում, ամփոփելով քառօրյան, ԱԺ «Ժառանգություն» խմբակցության ղեկավար Ռուբեն Հակոբյանը նշեց, որ քառօրյայում ամենակարևորը 2013թ. պետբյուջեի կատարողականի քննարկումն էր:

Ըստ պատգամավորի` կատարողականի քննարկումը ձևական բնույթ էր կրում, քանի որ այն կառավարությունը, որն իրականացրել էր դա, հրաժարական տվեց:

«Հանձնաժողովների ժամանակ ներկայացրեցին, թե 100 տոկոսով կատարել են, բայց կրկնակի չափով չէին կատարել տնտեսական աճը: Կարևոր կետը չորս քաղաքական ուժերի հայտարարությունն էր` անկախ ամեն ինչից, թե ինչ մեկնաբանություններ ստացան: Մենք գտնում ենք, որ մինչև սպետեմբերի 30-ն այդ կետերը կարող են կատարվել: Իշխանությունն ասում է` կառուցողական ընդդիմություն, լավ առաջարկներ են արել... Եթե նրանք կարողանան դա անել, մենք կողջունենք: Աշնանն արդեն համապետական հանրահավաքով կներկայացնենք արդյունքները և մեր հետագա գործողությունների ճանապարհային քարտեզը»,- ասաց Ռուբեն Հակոբյանը: