Կառավարությունը պետք է հաշվետվություն ներկայացնի` նախքան վարկային պարտավորություն ստանձնելը. Նաիրա Զոհրաբյան

Այսօր ԱԺ նիստում քննարկվում էր ՀՀ նախագահի ներկայացրած` Եվրոպական ներդրումային բանկի և ՀՀ միջև ստորագրված` Հայաստանի Հյուսիս-հարավ ճանապարհային միջանցքի վերաբերյալ պայմանագիրը վավերացնելու մասին հարցը:

ԱԺ ԲՀԿ խմբակցության քարտուղար Նաիրա Զոհրաբյանը հիշեցրեց, որ Հայաստանի արտաքին պարտքը մոտենում է 5 միլիարդ դոլարի սահմանագծին, և Հյուսիս-հարավ մայրուղուն տրամադրված վարկային միջոցների հետ կապված` Վերահսկիչ պալատը աղմկահարույց տվյալներ է ներկայացրել:

«Մամուլում տարբեր վերլուծաբաններ բացահայտումներ են արել, որ վարկն անարդյունավետ է օգտագործվել,  «ատկատների» փառահեղ մեխանիզմի հետ կապված` շատ բացահայտումներ կան: ԲՀԿ խմբակցությունը առաջարկ է ներկայացնելու, որ այսուհետ, նախքան հերթական վարկ վերցնելը, խորհրդարանում հաշվետվություն ներկայացվի, թե ինչպես են ծախսվել վիճահարույց վարկային միջոցները: Մինչև նոր վարկային բեռ վերցնելը` հաշվետվություն պետք է ներկայացվի կասկածելի վարկային միջոցների մասին: Չեմ կարծում, որ ԲՀԿ-ն կողմ կքվեարկի նոր վարկային բեռ ստանձնելու պարտավորությանը: Եկեք ստախանովյան տեմպերով երկրի վարկային բեռը չավելացնենք»,- ասաց պատգամավորը: