Արծվիկ Մինասյանն առաջարկեց հաշվետվություն ներկայացնել աղբահանության վարկային ծրագրի իրականացման մասին

Այսօր ԱԺ ֆինանսավարկային հարցերի հանձնաժողովում ՏԿԱԻ փոխնախարար Վաչե Տերտերյանը պատգամավորների քննարկմանը ներկայացրեց 2014 թվականի դեկտեմբերի 19-ին ստորագրված` «ՀՀ եւ Վերակառուցման եւ զարգացման եվրոպական բանկի միջեւ Կոտայքի մարզի կոշտ թափոնների կառավարման ծրագիր» վարկային համաձայնագիրը, որն իրականացնում է աղբահանության ծրագիր:

ՕԵԿ խմբակցության պատգամավոր Լևոն Դոխոլյանը հարցրեց Վաչե Տերտերյանին, թե ինչո՞ւ է ընտրվել հենց Կոտայքի մարզը, և ինչո՞ւ չի իրականացվում ամբողջական աղբահանության ծրագիր, այլ՝ կտոր-կտոր` որոշ տեղերում: Վաչե Տերտերյանը պատասխանեց, որ, ըստ երևույթին, Կոտայքի մարզն ընտրվել է, որովհետև այն ավելի մոտ է Երևանին, բնակչությունն ունի խտություն, և կան տնտեսական հիմնավորումներ: Նրա խոսքով՝ ծրագիրն առաջարկում է ռեգիոնալ աղբահանություն, առավելագույնս քիչ աղբավայրեր, շեշտը դրվում է դրա վրա` որպես հիմնավոր գործոն` էկոլոգիական տեսանկյունից:

Լևոն Դոխոլյանը հարցրեց, թե որքա՞ն աշխատատեղ է բացվելու այդ ծրագրի իրականացման արդյունքում: Վաչե Տերտերյանը կրկին չկարողացավ հստակ նշել, թե որքան աշխատատեղ կբացվի` ասելով, որ ծրագիրը դեռ կոնկրետացման փուլում է:

ԱԺ ՀՅԴ խմբակցության պատգամավոր Արծվիկ Մինասյանն առաջարկեց ներդնել ծրագրի իրականացման մոնիտորինգի գաղափարը ու հարցրեց կառավարությունը` արդյո՞ք կառավարությունը պատրաստ է  պարբերաբար տեղեկատվություն ներկայացնել այդ մոնիտորինգի վերաբերյալ: Վաչե Տերտերյանը նշեց, որ ծրագրի իրականացման մոնիտորինգ ՏԿԱԻ նախարարությունը ներկայացնելու է ոչ միայն եռամսյակային, այլև ամսական:

«Վարկային ծրագրի իրականացումը պետք է հրապարակային լինի` ամբողջությամբ: Այս վարկային ծրագիրը ոչ թե ենթադրում է աղբահանություն, որն իրականացնում է պետությունը՝ համայնքների համար, այլ համայնքներն իրենք իրենց համար են դա իրականացնում, պետությունը պարզապես հանդես է գալիս որպես երաշխավոր ու միջնորդ»,- ասաց փոխնախարարը: