Հեծանվամարաթոն Երևանում. կարող են մասնակցել բոլորը

Մայիսի 18-ին Երևանի Շահումյանի անվան հրապարակից կմեկնարկի հեծանվամարաթոն, որը կանցնի քաղաքի մի շարք կենտրոնական փողոցներով ու կավարտվի դարձյալ Շահումյանի հրապարակում:

Միջոցառմանը կարող են մասնակցել հեծանիվ ունեցող բոլոր ցանկացողները: Իսկ հեծանիվ չունեցողներին այն կտրամադրի սիրողական հեծանվային սպորտի ֆեդերացիան:

Մինչ այդ՝ մայիսի 8-ից, մեկնարկում է «Եղիր ակտիվ, ապրիր առողջ» կարգախոսով տեղեկատվական քարոզարշավը: «Եղիր ակտիվ, ապրիր առողջ» ծրագրի հիմնական նպատակն է տարբեր նախաձեռնությունների միջոցով խթանել առողջ ապրելակերպը:

Երևանի քաղաքապետի խորհրդական Սամվել Մերթարջյանն այսօր ասել է, որ հեծանվային տրանսպորտի նկատմամբ հետաքրքրությունն աճում է, և Երևանի քաղաքապետարանը ոլորտի մի շարք կազմակերպությունների հետ հեծանվային մշակույթի զարգացման ուղղությամբ բազմաթիվ ծրագրեր է իրականացրել:

«Կանաչաստան» ՀԿ-ի հետ ստեղծվել են առաջին հեծանվուղին և հեծանվային կանգառները:

Այժմ էլ հեծանվային սպորտի սիրողական մարզիկների ու ճանապարհային ոստիկանության հետ համատեղ կազմվել է աշխատանքային խումբ, որը մշակել է հեծանվային երկրորդ ճանապարհը: Ընթանում են նախագծի նախապատրաստական աշխատանքները:

Հեծանվուղին ներառվելու է փողոցային երթևեկության մեջ` հետագայում դեպի այլ ուղղություններ ընդլայնվելու հեռանկարով: Այս մասին հայտնում է Երևանի քաղաքապետարանի տեղեկատվության և հասարակայնության հետ կապերի վարչությունը: