Կենտրոնի դատարան մուտք եղած փաստաթղթերն անհետացե՞լ են

Կենտրոն և Նորք-Մարաշ վարչական շրջանների ընդհանուր իրավասության դատարանում` դատավոր Ալեքսեյ Սուքոյանի նախագահությամբ,  այսօր սկսվեց սնանկ ճանաչված «Հին Էրիվան» ընկերության դեմ հայց ներկայացրածների նախնական ցանկի քննարկումը:

«Հին Էրիվանի» դեմ հայց էր ներկայացրել 13 պարտատեր, այդ թվում`  «Յունիբանկ»  ընկերությունը: Ընկերության դեմ ներկայացված պահանջները մեծ մասամբ աշխատանքային են, ամենամեծը «Յունիբանկի»` վարկային պայմանագրից բխող պահանջն է: Հայց է ներկայացրել նաև նախկին կառավարիչը: Սնանկության գործով կառավարիչը Ռուբեն Խալաթյանն էր:

Նիստի մեկնարկին դատավոր Սուքոյանը նշեց, որ իրենք այս գործի շրջանակներում լսելու են 13 տարբեր քաղաքացիական գործեր:

Բանկի ներկայացուցիչը միջնորդեց ծանոթանալ գործի նյութերում առկա փաստաթղթերին, ինչը դատավորը բավարարեց: Ներկայացուցիչը նշեց, որ գործում ներկայացված առարկություններն անստորագիր են և չեն կարող համարվել օրինական փոստաթուղթ: Նա միջնորդեց գործը քննել արագացված դատական կարգով և հաստատել պարտատերերի ցանկը:

«Հին Էրիվանի» ներկայացուցիչ Դավիթ Դանիելյանը, սակայն, հակադարձեց՝  նշելով, որ դեռևս ապրիլի 8-ին, օրենքով սահմանված կարգով, դատարան են մուտք եղել առարկությունները: Սակայն դատավորը, հետազոտելով փաստաթղթերը, փաստեց, որ իսկապես առարկություններն անստորագիր են: «Երևի մեր աշխատակազմի թերությունն է, տեխնիկական վրիպակ է»,- ասաց դատավորը` միաժամանակ նշելով, որ արագացված դատաքննության անցնելու հիմքերը բացակայում են:

Հայցվորի ներկայացուցիչը մեկ անգամ ևս միջնորդեց անցնել արագացված դատաքննության, սակայն դատավորը նշեց, որ արդեն որոշում կայացրել է և այն չի կրկնելու:  Աշխատանքային օրվա ավարտի պատճառով դատավորն այսօրվա դատական նիստը հետաձգեց:

«Մեզ համար տարօրինակ էր այս ամենը, քանի որ մեր առարկությունները դատարան ենք մուտք արել սահմանված ժամկետում, սակայն, չգիտես` ինչու, պարզվեց, որ գործում ստորագրված առարկություներ չկան»,- մի քանի լրագրողների հետ զրույցում նշեց փաստաբանը:

Մյուս ներկայացուցիչն էլ ասաց, որ դատարանի գրասենյակի աշխատողի ոչ թե առաջին, այլ միակ գործողությունն այն է, որ տեսնի` ներկայացված փաստաթուղթը ստորագրվա՞ծ է, թե՞ ոչ: «Հիմա մեզ փորձում են համոզել, որ դատարանի գրասենյակն անստորագիր փաստաթուղթ է ընդունել»,- նշեց նա:

Ընկերության սեփականատեր Մանվել Տեր-Առաքելյանը ևս իր զարմանքը հայտնեց կատարվածի կապակցությամբ: «Այստեղ ինչ-որ մի բան կար, որը մեր թիմի համար անհասկանալի էր: Մենք 30 անձով ներկայացել էինք դատարան, որպեսզի ճիշտ մարտավարություն վարենք, մենք մտադիր չէինք նիստը հետաձգել»,- ասաց նա:

Նշենք, որ «Հին Էրիվանի» շահերը ներկայացնում է 4 փաստաբան, այդ թվում `Հայկ Ալումյանն ու ՀՀ փաստաբանների պալատի նախագահ Արա Զոհրաբյանը:

Հաջորդ դատական նիստը նշանակվեց մայիսի 12-ին: