ՊՆ, ԱԳՆ, ԱԱԾ փաստաթղթերն արխիվում կհայտնվեն 24 տարի անց

Անկախության տոնի նախօրեին ազգային արխիվի տնօրեն Ամատունի Վիրաբյանը լրագրողների հետ զրուցեց անկախության տարիներին ձեռք բերված արխիվային փաստաթղթերի մասին:

Նա նշեց, որ հաճախ արխիվը համեմատում են պետական խորհրդանիշերի հետ, որովհետև արխիվը պետության, ժողովրդի հիշողությունն է, այնտեղ պահվում է պետության և ժողովրդի պատմությունը:

«26 տարիների ընթացքում կարողացել ենք հավաքել, պահպանել և ապագա սերունդներին փոխանցել այն ամենը, ինչ եղել է մեր երկրում: Դրանք առաջին հերթին պետական մարմինների, հիմնարկների փաստաթղթերն են, որոնք մենք պարբերաբար համալրում ենք: Կան ընդամենը երեք պետական մարմիններ, որոնք իրենց փաստաթղթերն առայժմ արխիվ չեն հանձնում, իրենք են պահում: Դրանք են` ՊՆ-ն, ԱԳՆ-ն  և ԱԱԾ-ն: Մնացած բոլոր պետական մարմիններն իրենց փաստաթղթերը հանձնել են արխիվ»,- տեղեկացրեց Վիրաբյանը:

Նա ասաց, որ օրենքի պահանջից է բխում, որ այդ կառույցների փաստաթղթերը դեռ արխիվ չեն հանձնվել, 50 տարի հետո նոր կհանձնվեն արխիվ:

Վիրաբյանը նաև հայտնեց, որ Ազգային արխիվն այս տարի ստացել է ՀՀ առաջին նախագահի նախագահության շրջանի` մինչև 1997 թվականի փետրվար ամսվա փաստաթղթերը:

«Մինչև 1995 թվի Գերագույն խորհրդի փաստաթղթերը պահվում էին արխիվում, իսկ մնացած փաստաթղթերն ընդունում ենք հիմա: 1995, 1995-1999, 1999-2003 թվականների ԱԺ առաջին և երկրորդ գումարումների փաստաթղթերը` 8 տարվա, հիմա ենք ընդունում»,- ասաց արխիվի տնօրենը, ապա նշեց, որ կառավարության` մինչև 2005 թվականի փաստաթղթերն են նաև այս տարի ընդունում:

Նրա խոսքով` այս տարի առաջին անգամ Ազգային արխիվը սկսել է ընդունել դատարանների փաստաթղթերը:

Վիրաբյանը նշեց, որ փաստաթղթերն ընդունելու հետ կապված այժմ խնդիրներ կան, քանի որ իրենք այդ փաստաթղթերն ընդունում են էլեկտրոնային տարբերակով, սակայն այս ուղղությամբ էլ են կատարվում մեծ ծավալի աշխատանքներ, և խնդիրն իրենց համար առաջնային է: